孖人開倉+買相機

我發現我已經成功傳毒俾我老公，依家佢發現LC / Staub有promote 都會主動同我講話去睇。咁啱噙日發現孖人牌係我公司附近開倉，同佢提過下，佢已經過嚟接我收工一齊去睇。（其實我有講過話唔睇架，因為好似都無乜需要再買煲）。

開倉地點係我公司同一條街，只係行後幾楝大廈，去到大廈樓下，老公都好懷疑係咪真係有，因為楝大廈唔似開倉。但入到間店好細，似係陳列室，好少嘢咋，可能我對孖人本身無乜興趣，只係睇staub，staub放出嚟既有 24cm , 28cm 同埋心心煲。
心心煲我覺得LC會靚啲，其實個28cm都幾心動，只係HKD1,599咋。老公都講左幾次話買。
其實上星期都有諗過去康怡Aeon度買28cm，因為HKD1,599再有九折，唔洗HKD1,500，仲抵。但諗左好耐，我地得兩個人，28cm好似太大喇。所以一直忍手。所以睇完好快走。

又一星期

食左幾日中醫，其實都覺得好左。所以今日老公又陪我出去覆診。

今日個診所又係人山人海，好似比上星期仲要人多。

咸柑桔

近期真係沈迷浸嘢，抽起條跟，突然又想浸咸柑桔。
依排係柑桔季節，又見屋企有兩個樽所以就買柑桔喇。
講真，屋企附近個街市都算大，但行哂全個街市都係得一檔有得買，比預計之中少，所以唔理喇，照買。
本來買左一磅，又但覺得好似好少咁，覺得個樽仲有位，所以要多半磅。( $12/磅)


返屋企先用鹽水浸左啲柑桔先

終於同個蜂巢鍋做到朋友喇

其實之前一直都麻麻地覺得蜂巢鍋好用。
因為佢地蜂巢lon lon 好容易食咗啲裝左啲嘢入去，洗時要一個個lon 咁洗，好怕洗佢。
但啲人成日都話用耐左，佢就好好用，等同易潔鑊一樣。本來我都諗緊我要等緊耐至到依一日。同埋真係洗時太煩喇。如果唔係整無水蒸都盡量唔用佢。
但早前見有谷友話用佢嚟煎蛋，本來我都唔敢挑戰煎蛋，但又真係想試。點知真係得左。
而噙晚再整無水蒸排骨，食到最後，竟然無菜痴底喎。連老公都好出怪咁問，點解無痴底既。
YEAH..... 我終於同佢做到朋友喇。

另外，噙晚係第一次已經整醬料嚟醃排骨，因為老公話用現成嗰款蒜蓉豆豉醬唔好食，佢唔鍾意食，所以特登走去買豆豉嚟自己整，好彩老公都讚好食，又夠味。

張相係蒸前影，蒸後掛住拎出去俾老公試味就唔記得影喇。

薑檸酵素

其實之前一直都十五十六，諗緊整唔整薑檸酵素好。
一來要等成個月至有得飲，心急的我，我怕我會等得太耐。
二來，我怕薑會太燥熱，所以唔太敢整。
但咁啱我又想整嗰時，我老細既佛教師太又拎左啲自己種既蔬果嚟，咁我就問我老闆攞薑，佢俾左好多我呀，因為係師太自己種，咁唔會有農藥或者其它嘢，咁我就可以放心整喇。

由於薑太多，所以問我媽咪拎左個5L既樽，估唔到整完都過左半樽，不過其實還掂都整，又要等一個月，咁梗係整多啲啦，抵啲嘛，順便預左啲俾我手腳冰冷既朋友。因為薑酵素可以改善手腳冰冷架。

今次真係較上次認真，薑同糖都有磅過，今次既糖真係控制係40%。上次整嗰轉啲糖就亂咁落。

尖沙咀半天遊 - 中醫 + sogo

噙晚失落於抽LC紫煲系列後，今日就收拾心情出發到尖沙咀。

我終於都去睇中醫調理身體喇，其實話去睇幾個月，但拖到依家至去睇。
身邊朋友都介紹左唔少中醫俾我，本來都諗住去睇何樹勛醫師，但佢好似好難約，同埋每次都超多人去睇，我好怕要等好耐，所以一直遲遲未去開始睇。

最後有人介紹我去睇浸會大學既中醫，話唔錯，所以就去睇去喇。
我揀左去尖沙咀中醫藥診所，因為一陣要去TST SOGO血拼，所以位置啱哂。

由於今日第一次睇，所以醫師先開三包藥俾我試。如果無問題，就三日食完，如果唔得，就變成五日至食完。
因為我啲藥係補身，所以可以翻煲，每日飲兩次，但如果飲完覺得太補，唔舒服，咁就一日一次。所以要睇第一日食完既反應至可以決定。

今日終於搞清楚，中藥係唔係可以翻煲，以前啲醫師都同我講，啲藥唔可以翻煲，但今日依個醫師同我講，唔翻煲咪好浪費囉。因為我嗰啲係補藥，所以可以翻煲。如果係平時傷風感冒藥嗰啲就唔可以翻煲。

我今日既藥唔貴，可以話係我睇咁多個醫師最平嗰個。三劑藥都係$165，即係每劑都係$55（當然睇唔同既藥唔同價啦）。反而診金就要$300。
不過我見其它人比我仲貴，10日藥已經要$1000左右。所以我$465埋單，已經算抵。

Sogo 感謝周年慶

一年兩次既Sogo感謝周年慶又就快開始喇。
以前會留意護膚品有乜嘢特價，依家反而會留意家品。
不過其實暫時我都夠煲同埋無位放喇。而且，今次啲煲唔多吸引我。
反而想去睇吓Le Creuset既stonewear，因為好似出紫色呀。

Sogo感謝周年慶 : 2013年11月15 ~ 24日

http://sogo.pacim.com/thankfulweek/tc/index.php

我為煲狂

香港終於都出Lilac Mist，由於係限量版，今次安排左上網抽。

咁既安排，我覺得好過要人去排隊。

其實我之前已經買左個LM既花花煲。但買返嚟後覺得台灣版既LM花花煲無乜漸染效果，但係心心就多啲漸染喎（心心煲係睇人地啲相）

所以......... 我又再次上網抽喇。如果好彩可以抽到香港版既花花煲，我會放返之前台灣版嗰個花花煲，希望香港出既LM會比台灣版靚啲啦。

由於有三個Quota 可以揀唔同款既煲，所以我揀左花花，心心同Risotto 18cm
花花煲 - HKD2,388
心心煲 - HKD1,998
Risotto18cm煲 - HKD1,028

我的第一個酵素寶寶

想整酵素成個幾月，星期六終於的起心肝去買材料去整喇。
本來諗住整個簡單啲，只係檸檬＋奇異果。但見人地話提子整出嚟好飲，所以又加提子，其實人地係加黑提，但因為我唔多食黑提（因為有核，所以懶得食），所以老公要我買無核青提。
希望成功啦，淨係青提都買左手$40幾蚊呀，失敗要倒哂就肉赤死。

返到屋企即刻開工洗干淨啲生果。上網見人話提子凹下去部份好容易藏水，所以我一粒粒咁抹干，唔好有心份引致發霉。
我認，我心急，唔夠一個鐘已經忍唔住走入去整樽酵素。

玻璃瓶，刀，針板都用熱水消毒。

提子介十字，檸檬及奇異果就切片。
然後一層提子，一層奇異果，一層檸檬，再一層冰糖。然後再重複咁放，我只係放左兩次就差唔多到頂喇。所以就加層糖。確保所有食材都俾糖蓋到。

送給家姐的Le Creuset

天氣慢慢轉冷，又到食煲仔飯既日子。
由於家姐新屋企轉左用電磁爐，以前既瓦煲已經用唔到。
佢見我用staub同LC咁開心，所以佢又想試下用。其實之前佢好反對我用架。因為貴，而且佢聽朋友講，依啲煲係啲大廚用，好難用，所以一直唔多支持我用。
但上次佢知我去LC開倉後，問我仲乜唔叫埋佢，因為佢都想平平地買個試下嚟用。
所以我就買左依個20cm - Dune色俾佢喇。
20cm用嚟廚2~3人份量既煲仔飯啱哂，又可以用嚟燜吓嘢。
本來想買個stone色俾佢，一嚟顏色型啲，同埋係黑裡。但諗諗吓，怕佢用唔慣黑裡，因為睇佢都唔會點樣睇黑裡使用既方法。可能簡單啲白裡對佢嚟講會易用啲。

卥水拼盤

噙日下午同老公去完食嘢就去買嘢整我既卥水拼盤喇。

由於我地晏就成三，四點至食完嘢，所以晚上都唔太肚餓，所以最後食左部份卥水料出嚟食已經夠飽，紅腸已經得，但雞蛋未夠入味，花生未夠淋，豆腐可能煲得太耐，起左蜂巢，所以我諗豆腐唔洗點煲，就咁掉入去浸就得。

味道不錯，只怪自己跟包料落得太多水，打滿左個煲要煲耐左嚟收水。

粉嶺，大埔，觀塘半天遊

由於整餅人依家改左要俾訂金hold個3D蛋糕日子，所以今日老公就陪我入去喇。
其實由九龍入去真係幾遠架。

樂怡餅屋－粉嶺一鳴路23號牽晴間購物廣場地下G6舖

依家有一邊好似係專放3D蛋糕，見到有依兩個Demo



整餅人again... yeah

好開心呀，今朝不停狂打15分鐘電話後，終於係第28通電話有人接聽喇。

整餅人既電話係繼預約伯大尼之後第二個我認為難打既電話。

不過為左屋企人有靚蛋糕，難打都要打。

爸爸一月大壽既party，會有個靚靚蛋糕俾佢切啦，雖然貴啲，但都值得既。

依個麻雀蛋糕係我三年前訂俾我婆婆架。