咸柑桔

近期真係沈迷浸嘢，抽起條跟，突然又想浸咸柑桔。
依排係柑桔季節，又見屋企有兩個樽所以就買柑桔喇。
講真，屋企附近個街市都算大，但行哂全個街市都係得一檔有得買，比預計之中少，所以唔理喇，照買。
本來買左一磅，又但覺得好似好少咁，覺得個樽仲有位，所以要多半磅。( $12/磅)


返屋企先用鹽水浸左啲柑桔先

跟住再洗干浄，風干。

本來想跟BLOG友用另一個方法整，先用鹽完全蓋住啲柑桔一個星期後至入樽，咁期間得閒了下佢，睇下有無爛既，有既就整走，咁就可以防止，浸幾年之後至發現有爛。

但係........本來已經預多左鹽，但開哂兩包都唔夠蓋住啲柑桔。同埋已經諗好全盤放入焗爐內放一個星期，咁又唔阻地方，又方便可以拎出嚟。
但最終心急的我，見唔夠鹽，又唔想等咁耐，唔夠兩個鐘已經決定提早入樽，用返舊方法嚟浸。

以下條LINK 就係原先想跟住嚟整既方法喇，其實好似真係唔錯架。
http://www.beanpanda.com/2012/03/preserved_kumquat/#.Uo8BaSezWrU


放樽入櫃頂時發現媽咪前幾年俾我嗰樽咸柑桔。我無記錯依樽應該都差唔多有十年喇。打開個樽蓋，啲味道都係好香呀。