FREE - Pre-wedding

家姐朋友得知我地結婚, 所以將佢之前買左, 但一直無去影既台灣package 送俾我地.
嘩...... 個package 成$12,xxx 架. 真係多謝哂. 咁又慳一筆.

有人送啫. 咁我都要做吓功課既. 睇下去台灣影相要注意d 乜架. 間嘢要亞太麗緻, 好似無乜人影依間咁.

只係搵到d 舊post. 但見d 人都讚多既. 但因為都係幾年前既. 但之後睇睇下, 俾人讚既兩位攝影師都相繼離職. 之後嗰d 攝影師好多都俾人彈. 本來好開心既我, 真係睇到15, 16 , 諗緊係咪仲應該去影.

再睇埋佢地個website d 相...... 嘩. 我覺得我朋友係大陸影嗰d 仲靚過佢多多聲. 所以同男友商量後, 都係唔好用依個package . 費事連機票, 酒店錢都蝕埋.

帶四大長老睇場

其實經過多次睇場 , 同男友商議後, 決定係盈暉臺-  百樂門.  

須然酒樓外面環境一般 , 但入左酒樓後, 又好獨立吖. 佢地又好多嘢可以配合到. 連我地咁少圍數都可以俾我地包場.

所以今日中午就帶男友父母來飲茶,俾佢地睇下覺得有無問題. 佢地都覺得幾好. 仲叫我地快d 搵師傅擇日.

由於我家人下午至由澳門回港. 所以只好晚上再同佢地嚟食晚飯, 又順便睇場. 不過我媽咪覺得地點唔係太好, 佢喜歡mega box 既百樂門多d. 係咁問點解同一菜單價錢, 唔選mega box .
唉..... mega box 我一定包唔到場. 人地個場咁大, 如果有另一pair 人擺得多過我. 要間場就預左. 但個台呢?? 俾邊一邊呢?? 佢淨係諗部分既嘢. 唔諗吓出嚟既效果. 真係令我好激氣.

不過激氣還激氣 . 男友就話, 我媽咪唔鍾意. 咁咪再搵其它場囉...... 咁即係又要再去睇場囉. 

觀塘- 聘珍樓

上次嚟睇場，由於負責婚宴既經理放假，所以係由一位樓面帶我地睇場，但因為佢唔係負責依方便既嘢，好多嘢都解答唔到我地，所以唯有再嚟多次。

依個場都好靚，好典雅。出面較少有既，所以都幾鍾意。

今次其實主要問返有乜offer 、 min charge 咁。

單價都唔平，最平既酒席六千幾起，都仲係食鮑片，但出面其他酒樓，六千幾已經可以食原只鮑魚啦。

包出面大廳min charge 12萬5。但裡面VIP room 會照做街客。之前睇人地啲blog 話會俾埋啲VIP room 做麻雀房既，backdrop 後面又可以俾兄弟姊妹做休息區。但依家可能旺過以前。所以經理都企得好硬。

新娘房較細，所以會提供一間VIP room 做埋新娘房。但廁所就要同賓客一齊了。由於新娘房無獨立廁所，所以男友鍾意依個場都好，都話唔好，因為佢話我當日著住晚裝去廁所會好麻煩，所以要有獨立廁至得。

觀塘 - Club one

其實之前嚟觀塘睇場時嚟過一次。但當時有人擺酒中。所以睇唔到場。所以今日再特別過嚟睇。
如果擺酒時樓下、門口都無人，因為當日我地就係自己行左上嚟至發現有人擺緊酒。

其實我地覺得個場幾靚，睇上去唔似一般酒樓。
新娘房超大、又有獨立洗手間。
真係幾鍾意依度。星期五、六、日min charge ：12萬再加一。所以都同男友睇佢地公司既月曆，無七折、八折都好吖。
但如果想有折就唔可以選冬天，七月、八月較多有折扣既日子，九月都較少。但有折同無折既總單價真係差好遠，十萬變七萬。無折話，我圍數少，平均每圍要七千幾至meet到min charge 點算好呢。

其實我地由於依間酒樓，所以一直未決定到邊個月份擺酒。決定唔到又唔可以請人擇日，好煩惱呢！

TST - 百樂門

家姐話有朋友會係tst百樂門擺酒，叫我去睇下啱唔啱。（後尾至知原來佢朋友擺尖東嗰間百樂門，唔係依間）

入口係樓下，然後要上樓梯。對老人家唔太方便。
好彩如果擺酒既話，reception 、相薄等可以搬上樓上，如果要係樓下都幾麻煩，因為樓下較窄。我地等位飲茶都覺得好熱，如果冬天，相信佢啲門都唔係點防到風，凍病都似。

場地係長方形，經理話我地圍數唔算多，可以每行放兩圍，咁進場就中間一條大直路。但如果圍數多。要每行中間再放一圍（即係好似五筒咁），咁進場就較麻煩。
但如果每行放兩圍，會有幾圍係樓梯口後面。依幾圍又好似俾孤立咁。唔係咁好。
有新娘房、獨立廁所。但感覺一般啦。

觀塘- 譽宴、玉桃苑、尚宴、club one 、聘珍樓

嚟到至發現全座大廈都係酒樓。第一間就先睇譽宴。(由於今日無影相, 所以全部無相片可以作參考)

譽宴

環境我覺得普通, 係正常酒樓裝修. 相比起太子, 太子裝修好好多.

依度就有一個露台, 可以用嚟註冊 , 而擺酒當晚亦方便賓客走出嚟食煙, 唔洗走落樓下.

 

尚宴

裝修環境都係普通啦 , 唔知點解好唔鍾意佢d燈.

有兩間新娘房, 大間for 新娘用. 台另一邊又有一間, 但細d , 不過都有埋toilet 的. 可以俾奶奶用. 唔通有好多人反映同奶奶不和. 所以要兩間新娘房??

嘩…. 佢個min-charge 好貴呀 - 17萬. 酒樓咋喎.

 

 玉桃苑

同男友第一次聽依個名, 幫佢改左 “玉蒲團”. 本來都不寄予厚望 . 但出奇地滿意喎.

每一台都有一射燈照住台中間, 所有燈光都可以轉換顏色, 我地可以話食乳豬時要紅色. 中間時間要紫色. 其它時間要轉乜嘢色都得, 佢話到時有個燈光師係度.

Backdrop . 佢有三款 , 教堂, 中式. 西式. 只要一按制, 布簾即刻可以轉換. 好好喎. 咁d 相咪係唔同時段有唔同效果囉.

菜單 . 好多嘢都已經包哂. 即係當晚擺幾多圍就俾幾多錢就得. 無乜嘢要另外加錢.

不過包場min-charge 企得好硬,
一定要15萬. 我地提早年幾都唔可以俾我地包埋場.

因為佢有話俾我地知會點間俾我地, 間完出嚟, 佢只有約3, 4張台做街客生意. 但洗手間就要係返個場度行返出嚟, 經過街客至可以去到洗手間.

所以都要諗一諗.

 

 Club One

未入商場, 係樓下已經聽到音樂聲. 上一層就到30尺樓底既大堂, 但其實只係一個好細小既reception . 跟本不會久留.

上到去至發現原來有人擺酒中. 但其實一上到電梯頂已經係會場, 都幾open.

因為有人擺酒中, 所以只好第二日再嚟過.

 

聘珍樓

其實都無諗過嚟睇, 因為印象中依間嘢唔係平嘢嚟 . 但反正過開嚟, 就順手睇埋啦.

間嘢係商業中心裡面 . 部lift 好慢. 一開lift, 我都男友都”嘩”左出嚟, 因為見到既係一個空中花園. 可能無諗過係咁. 都幾意外.

跟住我地已經俾佢地既中式裝修吸引住, 因為出面較少見.

負責既經理休息 , 所以由一位樓面帶我地行左個圈了解一下. 但由於佢好多嘢都唔知 . 所以好快走左lu.

 

盈暉臺- 百樂門

其實本身無諗過嚟睇依個場，因為地點不是太好。但因為男友約了人，但又未夠鐘，所以順手過嚟睇下。

酒樓係商場內，但個商場彎彎曲曲、又無明確指示，我地行了一圈至搵到間酒樓，好彩商場不大。但因為行了一圈，發現依個商場出租率好低，都係以街坊生意為主，講真，感覺麻麻地。

但入到酒樓裡面又另一感覺。

我地睇場當晚係有聯歡晚會。圍數約18圍，同我地要既圍數差唔多。見佢地擺台都好寬落，麻雀台仲可以唔洗收。
因為只開了幾個月。所以16-18圍都可以包場。差唔多有乜要求都答應。連餐前小食要求轉做鮑汁鳳爪都無問題（因為家庭某一位成員很愛吃這呢）
Backdrop 、台上佈置、門口等所有佈置都有提供，唔需要再自己搞。仲有一座白色鋼琴係台呢。台上又有白色地毯，有地毯感覺靚好多。

新娘房都好大，但當晚聯歡晚會既工作人員使用這房作休息室，所以好快睇完就出返去了。有獨立廁所放新娘房中，但因為有人使用中，所以看不到，因為好似話有一按摩浴缸呢，咁就算夏天擺酒都唔怕啦，新娘房內又有按摩椅。
新娘房有兩個門，其中一個門係直通出面個台，佢地話，如果勘茶時，收到大禮，都可以叫人即時收入保險箱。或者隨時由台前走返入新娘房。


由於當晚係人地包場聯歡，所以都無影相，以下相片係同未來62、9帶佢地再睇場時影的。

黃埔海逸酒店- 中菜廳

由於某些原因, 所以今日獨自到黃埔, 咁就順手到媽咪叫睇既場地睇下啦.
其實由於我爸喜歡熱鬧 , 覺得酒樓會高興d , 所以一直都只係睇酒樓. 無諗過要搵酒店呢.

其實我媽唔講, 我都無諗過嚟依度睇, 不過一入去即刻俾場內海境吸引住, 我等緊經理出嚟前, 視線一直無離開過個海境. 但夜晚應該乜嘢都睇唔到. 所以依一part 可以不理.

個場都幾怪, 如果我地擺十圍內可以包到一邊. 但如果16圍, 就要擺埋另一邊. 個場好似"L"型咁. 咁即係有一邊要全場睇電視或者唔知發生乜嘢事.
BACKDROP , 佢地包既Backdrop 真係睇到我眼都突埋, 係十幾年前酒樓嗰款, 得一個囍字嗰款. 即係要俾錢搞啦.
出面receiption 又係, 又係唔俾錢見唔到人.

所以依個場, 唔啱我囉.

港島一夜遊 - Part .4 譽宴

譽宴 - 銅鑼灣
見仲有時間, 就去埋好多人讚好既銅鑼灣譽宴睇埋啦.
有獨立電梯, 咁d 賓客上落都方便d. 幾好.
樓底好高, 都好大間, 有一邊有第二層, 新娘房就係第二層.
同埋d 人讚話進場時由樓梯行落嚟, 全世界都望住好好咁. 但我只會擔心著唔慣高跟鞋既我會仆左落嚟啫.
個場既裝修我都覺得同其它場差唔多, 無乜特色. 可能我唔係嗰d 公主型啦. 依間我麻麻地.
同埋個min charge 無forum d 人講得咁貴. 要成20幾萬咁跨張.
但以我地既圍數, 只可以包到樓下, 即係新娘房隔離 (即第二層) , 會有街客食晚飯.

港島一夜遊 - Part .3 洞庭樓

美心 - 洞庭樓
第三站就係time square 既洞庭樓. 因為我地好懶, 所以都係拎住係婚展既既書, 搵嗰d 酒樓.
裝修都幾靚, 幾好, 但講真, 但15圍已經有d 迫. 如果要做埋註冊 , 要預留俾張台, 只可以擺大概15圍左右.
個新娘房細得好淒娘. 個經理都好老實話因為原先無諗過做酒席, 所以個新娘房都係後加. 只可以用板整個一part 俾我地放嘢 . 因為擺酒既有另一度門入, 所以間出嚟依part唔會俾食緊嘢既人見到. 但只可以擺15圍......如果真係選依度, 要叫我媽要少一, 兩圍喎. 再諗諗先.

 

港島一夜遊 - Part .2 翠玉軒

美心 - 翠玉軒

跟住就到中環既翠玉軒. 話俾人知係中環擺好似好勁咁 .

但入到去, 我地好快走返出嚟囉. 因為嗰度樓底矮, 當晚好似大概只有五台客晚飯中. 但都已經覺得幾嘈吓.

裝修同普通酒樓差唔多, 所以連相都無影就走左LU.

港島一夜遊 - Part .1 大舞台.

由於晚上約左朋友係銅鑼灣晚飯, 所以當然唔好浪費啦. 同男友搵返哂係婚展睇啱既酒樓去睇場.

其實我未去過大舞台. 所以就算都知未必會選擇 , 但點都想去睇一下. 所以第一間睇既場係大舞台.

去到無開既, 電梯又關了, 所以打電話問返聯絡人. 好彩佢話今晚有嘢要維修所以至休息. 但係樓上係有人的. 叫我地搬開個欄, 行上電梯搵人開燈俾我地睇.

嘩.... 真係好闊落, 好靚呀, 我鍾意佢古典既裝修 , 好特別好靚. 真係超鍾意呀. 但係我地只會擺大約15-18圍左右. 可能依度太大, 唔需要開樓上, 但個場又有少少怪. 因為電梯係中間. 咁進場時, 只可以係一邊進場, 另一邊既人未必望得到. min charge 都唔少呀, 要15萬. 我地要既日子又無折頭. 又要加一, 都幾貴. 如果選到既日子有七折就好抵囉.

酒樓的決擇

其實知道要擺酒之後, 心目中已經有一個首選, 就係大舞台喇.
但估唔到四大長老只有我爸讚嗰度好.  其他三位都唔鍾意嗰度. 不過未來62 , 99 知係我鍾意, 都同男友講, 如果係我鍾意既, 咁就按我意思啦.

不過見佢地咁專重我, 我都會努力搵下有無其它地方係合乎大家要求既. ( 其實我係怕煩, 所以睇中大舞台就唔想周圍搵場地喇.)

因為之前無諗過其它地方, 所以襯有婚紗展, 即刻同男友入場搵下資料. 

我地係婚展度擺左好多資料返嚟, 差唔多全部酒樓資料都攞哂, 因為知道大概既圍數. 所以主要搵可以包到場既酒樓嚟睇, 咁又可以收窄範圍. hehe... 我真係好懶呢.  

本來我都諗住選擇酒樓以好食為主, 裝修為次要. 但估唔到我媽竟然話環境仲要d, 因為d 人只會記得個場地靚唔靚. 咁要小心選擇 , 同埋開始我地既睇場生涯了.

通知男家父母

噙日通知完我父母，咁就淨返男友父母喇。
其實前幾年未來99都有催過男友結婚，但只係一直無理佢。
今日返左男友屋企食飯，順便通知佢地。佢地只係講句一早就應該啦。咁就完成左。
佢地都有問我地擺唔擺酒。果然，99話唔擺酒，只係註冊，之後都要請返親友食返餐，如果要請既，咁不如擺酒啦。
正式通知哂四大長老，咁我地就要開始行動喇。

返到屋企，我沖完涼出嚟，我男友話佢已經係FB改左我地為"已訂婚"。
啊...... 我地乜都未搞，連幾時婚期都未決定，我真係唔想公開住，佢見我咁講，話咁改返囉。但改左唔夠一分鐘，已經有幾個人係度讚同講恭喜，所以就算喇。有人問就老實答佢地乜都未搞啦。

提親

家姐細佬也不在香港，所以就陪我家倆老食飯，順便由男友提親。
今日入左元朗泰屋企食，坐露天位。一直諗緊男友幾時講，因為食到中間佢都未講，想點。
無幾耐，男友突然拎走我父母既手機（因為佢地成日玩whatsapp），話有事要講，就係＂我地決定要結婚喇＂。爸爸就講句恭喜，媽咪就問係咪佢地第一個知，咁當然係啦，可能佢會覺得我地會專重佢。
其實我父母都係好開通既人，我同男友住埋一齊咁多年，從來都催過我地結婚，只要我地開心就得喇。
佢地有問過我地點搞，我地話擺酒。跟住媽咪講左幾次佢唔介意我地唔擺酒，因為唔想我地嘥錢。但因為預左未來99要我地擺，所以我只係講男友想擺。
就係咁，就順利完成通知我父母既任務喇。