南瓜煲 - 入手

今日幾經辛苦終於知道原來只有屯門及康山既Aeon 可以單買一個南瓜煲而又有優惠價。

本來諗住黃埔都有Staub counter，點知去到行左兩個圈都唔見。問返職員至知原來裝修中。所以就開始不停打去唔同地方度問，全部都只做買一送一。

老公最後決定入去屯門度買，真係超開心。因為老公今次完全無講過任何反對既說話，我打電話打到想放棄時，都係佢叫我再問多兩間。

入到屯門Staub，見個煲好似好細個咁，都有諗過係咪真係買架。容量比我個24 round 再細一啲。但最後都係乖乖俾錢。因為真係好靚。唔買我怕將來人後悔。

南瓜煲，Aeon 單買一個特價$1399，職員先借出金券$120。即最後價錢係$1279。真係超開心。
不過要等4-6個月至有貨可以攞。好鬼耐呢。

Staub 南瓜煲 vs Le Creuset 50% off

Staub 既南瓜煲一直令我好心動，因為外形實在太靚喇。
不過我見過真身一次，個煲蓋要放返同一個位置至可以蓋實，好似有少少麻煩。
同埋上次去買煲時，sales姨姨都話，南瓜煲外形係靚，但鎖水效果無普通款咁好，同埋煲蓋內無Staub特有既水珠設計。

但噙日有谷友報料話屯門吉之島Staub有新promotion，南瓜折左$1,399後，再可以減$120 coupon (我唔知coupon點嚟)，即係折實$1,279。
原先我都諗住如果俾我撞見$1,399都會買，依家仲要唔洗$1,300，真係令我心郁郁呀。但我買左之前兩個煲都只係兩星期，咁快再買好似好過份喎。


** 相片由谷由提供。

蝦米蒸水蛋

毫無煮飯天份既我，竟然第一次整蒸水蛋就成功，仲得到主人既讚賞。

雖則以前都久不久都有煮吓飯仔，但煮來煮去都係嗰兩三款。亦聽好多朋友講蒸水蛋好容易失敗，所以都從來無挑戰過依個菜式。但近期見其它谷友成功，亦有提供食譜，所以就試整左一次喇。原來比想像中還要容易呢。

材料：　
雞蛋　4隻　　　　
水　　蛋液的1倍半
鹽       少許
蝦米　適量

做法：
1.  先將蝦米浸軟，備用。
2.  鍋加入水、蒸水架及一只吉碟，放入蝦米於碟中，開火。（水由凍水煮至水滾）
3.  蛋液先打勻，再與水一齊再打，放鹽再打勻。
4.  水滾後，將打勻既蛋液倒入鍋中已經煮熱既碟中，蒸 2 - 3分鐘，熄火後再焗約15分鐘。（其間不可以開蓋）
5.  最後淋上生抽等，完成。

P.S. 以上蒸煮時間以Staub及Le Creuset 等鎖水功能用具來計算。

我仲同主人講，雖則個煲價錢效貴，但係之後每回煑食時間都縮短左，長遠計，都慳返唔少煤氣同電費，主人都好認同，我諗下次再買煲應該會好順利。

海鮮粉絲鍋+木魚碎豆腐

噙日同老公一齊落街買餸，放假就食好啲啦。

走左去買材料整海鮮粉絲鍋，但買得太多材料喇，啲菜我都係放左好耐至可以放得哂落去，再加埋粉絲，真係迫爆喇，無位再買豆腐落去，所以豆腐就做左冷盤。

成個鍋原鍋上台，我地食完個鍋都未冷，同埋太多喇，最後分左兩餐嚟食。

Nail

噙晚休戰一天，無煮飯，去左為指甲扮靚靚。
好鍾意今次套甲，出嚟效果好靚呀。

首嘗無水蒸肉餅 及自製豆腐花

噙晚試整無水蒸肉餅，之前見谷友整無水蒸（魚 / 雞 / 肉餅等），已經覺得好神奇，所以個鑊開光後，更係自己試吓先啦。

老公知我整無水蒸肉餅都走入廚房八吓，我地仲嗅吓會唔會已經傳出燶味，諗定埋後路轉食乜嘢。

整無水蒸比隔水蒸快，我落左舊肉入鑊後，用中火蒸約4分鐘，跟住轉用細火再蒸5~6分鐘左右，後然關火再焗，其實谷友話焗約5分鐘，我就炒埋個菜至成個鑊搬出枱。

因為我個鑊比佢地用既款大同高少少，所以我蒸同焗既時間較長時間少少。唔知係咪因為咁，個餅底有少少痴底。但整體嚟講都唔錯。

蒜蓉炒菜心苗 + 糖醋排骨

個鍋同鑊做左兩日吳鋼嚟養鍋，就可以用喇。
第一次開光，點都要post吓既。

蒜蓉炒菜心真係無乜特別，但比起我之前個易潔鑊比，起碼掉菜落鑊時，聽到好耐無聽過既＂沙沙＂聲。

結婚五個月禮物 - Staub

近排迷上Le Creuset 同Staub，特別入左個FB既Group後，簡直中埋毒，連平時唔多煮飯既我，都有幾款想煮。

以前一直唔明點解一個煲或者鑊可以賣到咁貴。入左個Group後，開始有啲明白，所以成日心思思想買，一有時間就上網睇，研究邊款較多款式可以整到。

近排Staub做緊買一送一，所以星期日又捉左老公去睇煲，本來都係想睇吓先，因為都係覺得貴，同埋唔知想買邊款。
但經過sales姨姨詳細講解用法及好處，同埋老公不停在旁煽動（可能佢唔想再俾我捉去睇煲喇），所以最後就買左個湯煲同蜂巢鑊喇。

佢地就係我首次戰利品喇。

三朝回門

由於結婚當日行程太趕，無法即日回門，所以就選擇三朝回門。

酒樓送左隻回門豬俾我地，之前約好太約六點鐘左右過嚟拎。上到酒樓即係廚房拎出嚟，啱啱燒好無耐，仲好熱架。放係架車度，香味充斥全車，老公講笑話依架係運豬車。

上頭夜

差唔多九點，老公要返去老爺屋企度上頭，但因為我太嘢要搬過去媽咪度，所以老公幫我手搬埋上樓至返屋企。物品包括其中一隻愛犬，佢過嚟陪我出嫁。

返到媽咪屋企，我其中一個姊妹 － 即係我堂家姐已經到左，係度整緊"愛的宣言"，佢今晚會係度瞓，因佢明天要6點開始化妝。
咁我就幫佢地熨吓啲姊妹裙，然後又整吓我個DIY水晶波裝飾。(好似好得閒好無聊咁)

因為爸爸同家姐仲未返到嚟，所以期間我都無特別心急。但見時間越來越接近，佢地都仲未可以回程，都知道趕唔切架喇。講真，都有啲唔開心架。因為本身其實都有幾個親戚想上嚟一齊高興吓。但俾我鍾意潑冷水既媽咪一句話＂聽日要早起＂，搞到無人敢上嚟，最後連爸爸，家姐都趕唔切返嚟。上頭上得好冷清呢。

上頭前，見老公都仲未打嚟話佢上完頭，以老爺咁緊張既性格應該唔會拖咁耐，所以打去問下，點知原來老公一早已經上完頭，只係唔記得左要打俾我。

所以我太約10:45PM開始上頭，本來堂家姐有拍低上頭過程，但最後至發現按錯制錄唔到。一個月前過大禮有過埋柏葉，見仲好綠，就用返嚟上頭，點知原來已經乾哂，媽咪插上我頭上無耐，已經開始係咁甩，所以食完湯圓，我已經問係咪可以拆返落嚟。

還掂家姐佢地趕唔切，回程途中已經11點幾，咁啱趙太又差唔多到地鐵站，所以就叫家姐幫我拎埋恤衫返嚟（其實唔係趙太打嚟，我都唔記得仲有恤衫未攞）。而細佬睇完話劇回來後，就幫堂家姐一齊落街同係屋企度貼囍貼及對聯。爸爸都有幫手貼呢。

婚前忙碌的一天

婚前一日都預左好忙，因為要周圍去拎嘢。
所以之前一晚已經先去整定指甲，費時迫埋哂同一日度搞咁多嘢。

本來星期一約左去洗牙，但因為突然約左姊妹食飯傾嘢，而洗牙嗰邊又要等幾個人，所以轉左今日洗牙，咁我就唔可以瞓到自然醒至去拎嘢，因為約左中午12點去牙醫度。

頭紗

商戶評分
最高為5 分 -

******************************
商戶:  Peggy
評戶:   5分 (最高5分)
*******************************

頭紗，其實見過朋友用婚紗店既頭紗，影相出嚟效果係睇唔清楚個樣之後，已經好肯定會自己買返個好啲既頭紗。
但係買乜嘢長度既頭紗，我就煩惱左好耐。

由10月底confirm左婚紗之後，已經成日睇返個拖尾，買乜嘢長度好。我自己偏向長頭紗，但個拖尾邊位有lace及閃石，所以令我唔敢下決定買最長既長度－cathedral length，怕cover哂，但又一直覺得越長越靚。經過多返考慮及唔想趕唔切訂返嚟（因為由英國訂返嚟）。

係11月10日終於再同Peggy聯絡，Confirm要Floor pencil edged veil（28 + 80 inches），其實之前曾經問過Peggy意見架喇，但自己個選擇障礙症又出現，一直下唔到決定。本來Peggy話啱啱cut 左單，但佢好好，即刻幫我同英國聯絡，可以趕上個shipment。我個靚靚頭紗係11月19日就到港喇。

但我一直好懶，而且諗住未用到。所以係12月18日至去攞個頭紗。

其實Peggy有提過我，可以自訂尺寸長度，唔一定要佢網上註明既尺寸，但我費時自己再諗一大餐喇，所以跟返佢既尺寸嚟訂。諗返轉頭，如果可以再揀，我會想前面加長一啲，因為我用個花球要放高少少位置至掂到個頭紗。

之前由其它 Blogger 介紹中都知道個頭紗已經加上了髮梳，咁就可以直接插上頭。（好細心）

頭紗既質量，老實講，我唔識睇，但比起我淘寶既一定好。steam左會軟身一啲，但唔係完全軟到貼哂面嗰啲。

由於伯大尼地方較細，而我地既攝影師亦無特別由我背後影相。所以我搵唔到一張相可以完全睇清楚整個頭紗及婚紗拖尾既相俾大家睇。但以下既相可以睇到，即使個頭紗摺了兩，三層，仲可以見到我個樣架。
（我朋友之前既相，係摺左一層既位置已經係睇唔到個樣架）


依張相，我老公自已retouch架，好鍾意張相。

唯美主義

商戶評分
最高為5分 -

******************************
商戶: 唯美主義
評戶:  5分 (最高5分)
*******************************
唯美啲衫真係唔錯，啲sales又好，雖然我最後揀衫至還衫Carmen已經放緊產假，由其它同事跟，但都跟得好好呀，雖然有啲小插曲，但佢地都想辦法補救。（不過唔關我事，係媽咪衫啫）

婚紗：我由頭至尾都係揀依條，無轉過，因為個拖尾真係好靚，但攝影相啲相返嚟後，至發現無乜邊張相會清楚影哂整個拖尾，連伯大尼進場時，都只有由前面影，無人係後面影過。（不過我都無特別request，唔怪得人）

另外，其實佢地配左個小號既裙撐俾我用，但啲姊妹幫我換衫時，認為用大裙撐可以令條裙無咁長，話會好啲，咁就出事喇。婚後睇返親友既相時，已經覺得條裙太拱，好奇怪咁，有啲仲現左啲圈出嚟。

因為大部相都無清楚可以睇到條裙既全身相，所以post依張等轉妝時無聊影既相。大家都可以睇到條裙撐到幾恆。


迎賓：其實係為左依條裙而join唯美，條裙真係好靚，好鍾意。但做迎賓就可能唔多夠搶眼，但媽咪係婚前都不停讚依條裙，所以最後都決定用返嚟做迎賓。
本來有個可以後加既大蝴蝶結及長紗尾架。但之前有其它jm big day時整爛左，佢地再配返個顏色有啲色差，深色左，講真，真係無以前嗰個咁靚，但都諗住照用，但當日至發現，係連扣上裙既方法都唔同左，總知褂起後，個蝴蝶結會向下哂，睇唔到個蝴蝶，好怪。同埋行行下又好容易甩，為免要其它姊妹成日跟我尾，所以最後都除左，無再用，還掂迎賓相多數影正面。

敬酒：依條又係第一次正式揀衫時已經揀左，本人比較喜歡紗裙。而且依條比較清，又無拖尾，啱哂敬酒著。

送客：依條＂史力加＂係我最後一次揀衫時轉的，因為媽咪同老公都唔鍾意我揀嗰條刺繡，其實我真係好鍾意條刺繡，轉左依條後，心情都有啲失落架。
本身真係無諗過會試依條上身，佢地一拎出嚟，我已經忍唔住叫佢做史力加，但佢地大力推介，不停叫我試，所以就試下啦，點知著出嚟後，老公竟然讚好，而其它款我又麻麻地（因為無得揀條刺繡），所以就是但揀左依條。點知睇返當日既相，影相出嚟既效果，依條裙好似係最靚。

本身條裙有條紫色腰帶架，但放左係個裙袋底，我到還衫時至發現條腰條，所以我結婚當晚係完全無用過條腰帶，但完全無發現。

後記：還衫時，至發現原來其中一條裙既衣架，可能同酒樓既衣架倒轉左，所以要俾$50.00，如果之後搵返個衣架，可以去同佢地換返$50.00，但當日我只有一張$500係身，佢地又無錢找，所以我係銀包度搵左一張$50惠康現金卷，問佢地接唔接受，哈哈哈，好彩佢地又受，仲叫我想要返，就快啲攞返個衣架嚟換。