返到媽咪屋企,我其中一個姊妹 - 即係我堂家姐已經到左,係度整緊"愛的宣言",佢今晚會係度瞓,因佢明天要6點開始化妝。
咁我就幫佢地熨吓啲姊妹裙,然後又整吓我個DIY水晶波裝飾。(好似好得閒好無聊咁)
因為爸爸同家姐仲未返到嚟,所以期間我都無特別心急。但見時間越來越接近,佢地都仲未可以回程,都知道趕唔切架喇。講真,都有啲唔開心架。因為本身其實都有幾個親戚想上嚟一齊高興吓。但俾我鍾意潑冷水既媽咪一句話"聽日要早起",搞到無人敢上嚟,最後連爸爸,家姐都趕唔切返嚟。上頭上得好冷清呢。
上頭前,見老公都仲未打嚟話佢上完頭,以老爺咁緊張既性格應該唔會拖咁耐,所以打去問下,點知原來老公一早已經上完頭,只係唔記得左要打俾我。
所以我太約10:45PM開始上頭,本來堂家姐有拍低上頭過程,但最後至發現按錯制錄唔到。一個月前過大禮有過埋柏葉,見仲好綠,就用返嚟上頭,點知原來已經乾哂,媽咪插上我頭上無耐,已經開始係咁甩,所以食完湯圓,我已經問係咪可以拆返落嚟。
還掂家姐佢地趕唔切,回程途中已經11點幾,咁啱趙太又差唔多到地鐵站,所以就叫家姐幫我拎埋恤衫返嚟(其實唔係趙太打嚟,我都唔記得仲有恤衫未攞)。而細佬睇完話劇回來後,就幫堂家姐一齊落街同係屋企度貼囍貼及對聯。爸爸都有幫手貼呢。
而我就繼續整我個水晶波波,比我預計整得耐,差唔多搞到成兩點,整完已經好眼瞓,本來諗住好快搞掂,仲拎埋啲用品過嚟,想整埋個水晶花球(已經完成一半),但因為太眼瞓喇,所以是但搞掂左個襟花就瞓喇,本來諗住晚上進場時用依個珍珠花球,老公就用珍珠襟花。
而我整嘢期間,家姐就自己試玩明天玩兄弟既遊戲,係度自誤一翻。因為佢有啲物品要明天由自已屋企拎過嚟,所以由12點多開始,我地已經叫佢快啲返去,再唔係就留係度瞓,但佢好似差唔多成三點至肯走,真擔心佢會唔知醒。
臨瞓前,緊係做返個補濕Mask至瞓啦,因為唔想結婚嗰日啲皮膚乾到裂開咁失禮。
**跟住由於出現較多朋友既相片,所以將會私友化。
好多回憶呢!!
回覆刪除[版主回覆06/11/2013 09:22:12]係呀, 依家都好深刻呀.
水晶花球好靚呀!!!!
回覆刪除[版主回覆06/12/2013 01:11:31]我都覺得好靚呀. 但自己當日太眼瞓, 之前又懶懶閒, hea 住整, 所以最後完成唔到.
珍珠花花好靚呀!
回覆刪除[版主回覆06/13/2013 13:40:57]無帶過個襟花呀,我換左迎賓後,已經周圍搵,但唔記得放左係邊,跟住是但攞左細佬個襟花俾佢用就算。
點知返到屋企執嘢至發現放左係個細化妝袋內,個袋一直係新娘房既枱底,即係一直係我腳邊。
[Okayman回覆06/13/2013 09:16:44]吓? 搵唔到? 即係無帶過??
[版主回覆06/12/2013 01:19:27]我都好鍾意呀, 但只係完成個襟花咋, 仲要當晚搵唔到俾老公用.
哎呀呀~個花球趕唔切有點點可惜, 因為佢真係超靚呀!
回覆刪除[版主回覆06/13/2013 13:47:29]哈哈... 都係衰自己懶,因為自己整左幾個月都未捨得埋尾,因為好似整完出嚟大概效果都差啲咁。見過淘寶有架,但好似成RMB4~500/個,好貴,所以唔捨得買。
珍珠花球好靚, 好有心思呀!!
回覆刪除完成唔到, 真係可惜呀!!
[版主回覆06/18/2013 13:42:01]哈哈.... 只可以怪自己懶, hea 住做, 因為一支支既珍珠已經串好左大部分, 係成日懶得束起一束睇下仲欠啲乜.
珍珠花球好好好好好好靚, 好有心思呀!!
回覆刪除[版主回覆07/25/2013 09:17:17]hehe... 但最後都完成唔到, 依家有人咋珠珠係度, 都諗緊點處置佢好.