婚前忙碌的一天

婚前一日都預左好忙，因為要周圍去拎嘢。
所以之前一晚已經先去整定指甲，費時迫埋哂同一日度搞咁多嘢。

本來星期一約左去洗牙，但因為突然約左姊妹食飯傾嘢，而洗牙嗰邊又要等幾個人，所以轉左今日洗牙，咁我就唔可以瞓到自然醒至去拎嘢，因為約左中午12點去牙醫度。

洗完牙就自己先出TST唯美主義度試衫，而老公就拎佢架愛駒去洗白白，等結婚嗰日影相時靚仔啲。
原先同媽咪講好左我幫佢拎埋衫，因為前兩日已經final fit左，點知我坐緊車出去期間，我媽咪好似好擔心啲衫改得唔啱身，所以我叫佢出埋嚟試完至拎。
本來計劃係老公洗完車就同我細佬揸架7人車出嚟一齊去拎嘢既，咁依家又加多左我媽咪一齊同行喇。

因為老公上星期同兄弟去買恤衫時，順便係趙太度訂多件黑色恤衫，今日至有得攞，所以去唯美攞完衫，就去趙太度。咁我又買左個煲呔俾細佬用，所以又叫佢同我上趙太度，買埋恤衫俾佢，咁用煲呔會好睇啲。但上到去，老公件恤衫未返到貨，所以趙太答應今晚收工時送來我屋企附近地鐵站俾我。其實我真係唔太想，因為我上頭時間係9~11點。所以唔想今晚至攞，但無辦法，所以今晚要搵人幫手落去地鐵站度攞。

跟住就去油麻地京華度拎套褂－大五禮，媽咪第一次睇我套褂，佢都話好靚，但佢覺得貴。

然後仲要去金都幫我爸爸攞禮服，因為佢唔記得左今日要去拎禮服，出左街（佢以為聽日攞都仲有時間，所以約左人出街）。
幫爸爸拎禮服，又有一笑話，因為原本媽咪無諗過出嚟，所以俾左張單我細佬，放左係餐台，點知媽咪之後決定一齊出嚟，我細佬以為佢會拎張單，但最後大家都無攞，好彩之前佢地send 過張單既相俾我，最後只係拎住個電話去華利高度攞禮服。好彩佢地都俾我地攞咋。

去完攞爸爸套禮服已經差唔多5點，我今日全日都無食過嘢，見附近有間大家樂就食左個下午茶餐至再繼續。好彩一早已經記低哂要去邊度拎嘢，如果唔係實漏地方。

原先個尾箱已經放左我地之前準備既嘢，再攞埋今日攞既嘢，已經迫爆哂，放係最底既foamboard (我地logo 同seating plan)，我都有啲怕壓爆佢地。但好遺憾無影低放滿哂嘢既車尾箱既相，我都唔明點解可以有咁多嘢要搬。

然後就到觀塘Like姊妹裙度拎對汽球公仔。我只係俾左主題顏色: 紫色阿寶，阿寶就幫我整左對公仔喇。

終於可以上酒樓度放低部份嘢。除左媽咪係停車場度等，我地三個人，六隻手全部拎滿哂嘢上酒樓，其實我係半拖啲嘢上去。莫經理好有交帶話我地訂既七箱紅，白酒，今日都已經送到左，同埋已經鎖好左。

跟住，我仲要同老公到觀塘地鐵站間Choux Creme 度訂芭芙，因為本身酒樓已經包左席前小食，而老公又怕我訂得太多，會剩哂係度，所以最係只係訂左32件。因為到時會再攞其它西餅，所以佢唔俾我訂多啲。

到左依度，我已經好攰喇，由朝早到夜晚至返到屋企。但差唔多返到屋企至醒起要去拎花球，好彩係屋企附近啫。拎完花球同老公係樓下食少少嘢，就返屋企整埋未完成既嘢。就係入利是喇，其實之前已經入左啲，但都係怕唔夠，所以決定將所有錢，入哂佢，利是多好過唔夠嘛。