其實上年睇電視見人地曬,已經好想曬。但我唔係好陳皮個味,真係可以話係c food 痕。就係因為依個原因,老公都唔太贊成我曬,話幾年之後又攞嚟掉,製造垃圾,所以我都唔敢提出去果欄買一箱嚟曬。
之前係街市見過啲檔口有一兜兜既果皮買,諗住去買嗰啲返嚟再自己串。點之想去買時又唔見有,原來佢地已經串起哂,等人可以一串串咁買。
我最後買左兩串,本來$80/串,我依個師奶仔緊係講吓價啦,最後$155/2串成交。
一串俾自己,用嚟紀念我地今年結婚,三十年後既結婚紀念日,我就有30年既果皮喇。
另一串係送俾我好朋友既,因為佢今年生左個小女兒,用嚟送俾佢既。到佢大個結婚時,咁就有陳年果皮做嫁妝喇。
因為係第一年曬,所以係咁問事頭婆曬果皮既嘢,佢話今年曬完就可以收入罐,用鐵罐好過玻璃瓶,因為玻璃瓶可能俾陽光曬到無咁好,用鐵罐好啲,咁就可以一直收係罐內唔需要再拎出嚟再曬,亦唔需要加入炒過既白米入去吸濕。同我上網見人教,頭兩,三年都要拎出嚟曬吓吹吓風有啲分別。
最後事頭婆仲拎左罐佢係2008年曬既陳皮俾我睇,即係已經曬左5年,一打開個蓋,真係超香呀。希望我嗰啲都有咁香啦。
依張相我係生果檔度買時影,佢係用"權"字既新會柑整架。其實係咪 "權"我唔知有乜分別,但人地話依隻係好嘢。