粉嶺，大埔，觀塘半天遊

由於整餅人依家改左要俾訂金hold個3D蛋糕日子，所以今日老公就陪我入去喇。
其實由九龍入去真係幾遠架。

樂怡餅屋－粉嶺一鳴路23號牽晴間購物廣場地下G6舖

依家有一邊好似係專放3D蛋糕，見到有依兩個Demo



還掂入左嚟，所以老公就問我想唔想去埋大埔間凍肉舖度買嘢，因為之前我成日都同佢講想入去睇吓，因為見好多谷友都勁話平，又話啲貨同CC叔婆一樣，但價錢平一節。有啲仲誇張到由香港揸車入去掃貨。
過緊去途中，發現前面架凍肉車就係梁九記架車，即時諗起話佢地每日大約5~6點左右會fill貨，我真好彩。
梁九記其實係大埔綜合大樓一樓。幾多號舖真係唔多記得，好似係L9。總知佢地有幾間凍肉舖連住，最大最多人嗰間就係，佢斜對面仲有一間係賣干貨，調味料嗰啲嘢。

由於本身雪箱唔係有好多位，所以都唔敢買太多。依度埋單都係$210左右，真係好平。
其實有好多嘢都想買，但都係買少少，試下先啦。

依個稻庭烏冬本來都想買，但最後唔記得左攞。

 返到屋企至影張大合照，其實真係買左好少，試左好食，下次入去買多啲。

美國極佳西冷$30咋，仲要都幾厚吓，本身老公鍾意食薄西冷多啲，但真係太平喇，忍唔住買左嚟試。

美國安格斯Ｑ皮牛扒$68有四件，其實由兩大件切開，我記得有谷友話依款好食，所以即攞，因為得一包咋。

美國純天然頂級豬仔骨$34，想整依款好耐喇。不過諗緊用上次759買嗰支韓醬整好，定買黑鬼醬整好。

美國天然帶骨豬扒$33/3件，其實我都唔知佢係咪即係豬鞍，但依排想買豬鞍嚟試，又見佢平，所以又買。

美國天然豬梅頭扒－$31/5件，又係平，所以買，買左見谷友話依隻好淋好食。等我又試下先。

越南魚柳 - $15.50/2件，本來想買另一隻外國貨，好似係紐西蘭，但老公話試下平既先。

買完凍肉，再過對面馬路買老公鍾意食既蘋果批，其實之前都買過一次，佢話好食，所以今次再去買，買左一個大既。$66

今晚返99度食飯，老爺佢地都讚個批好食，好香。姑奶個女咳緊，但都食左唔少。

華輝餐廳 - 大埔鄉事會坊17號地舖  

其實我唔記得左影張，張相係Open rice度搵落嚟咋，希望唔好好介意。

跟住再要去觀塘，因為前幾日見人整卥水，本來老公都話自己整麻煩，但講講吓，越講越多想食啲乜嘢，咁啱又見有人話大孖既卥水包料好正，唔同出面普通街市買嗰啲，所以今日出門前打去問佢地收幾點時，阿姐順手話幫我留起一包。
六點由大埔出發到觀塘已經六點，大孖收七點，好彩6點半已經到達。

一去到同阿姐講聲，佢真係幫我留左一包，話想要多一包，佢睇一睇，話已經無哂喇，好彩今日打嚟問，佢又幫我留起一包啫。晏就打嚟時，佢都話仲好多貨，唔怕無，不過我係要既就幫我留起先，實在太好彩喇。
不過好想買既盤鹽就真係無喇，問幾次都話無。

大孖醬園－觀塘崇仁街33號

大孖原來好近我地買過大禮用品嗰個街市，不過附近無停車場，只可以係附近停一陣，但嗰邊勁多車。

大孖卥水料－$15/包

貼紙上有教點樣整，除左加水，仲要加生抽，老抽，冰糖，份量全部都有註明。

包料好香，但我只係知裡面有香葉，辣椒干，陳皮。其它我就唔識喇。