我的第一個酵素寶寶

想整酵素成個幾月，星期六終於的起心肝去買材料去整喇。
本來諗住整個簡單啲，只係檸檬＋奇異果。但見人地話提子整出嚟好飲，所以又加提子，其實人地係加黑提，但因為我唔多食黑提（因為有核，所以懶得食），所以老公要我買無核青提。
希望成功啦，淨係青提都買左手$40幾蚊呀，失敗要倒哂就肉赤死。

返到屋企即刻開工洗干淨啲生果。上網見人話提子凹下去部份好容易藏水，所以我一粒粒咁抹干，唔好有心份引致發霉。
我認，我心急，唔夠一個鐘已經忍唔住走入去整樽酵素。

玻璃瓶，刀，針板都用熱水消毒。

提子介十字，檸檬及奇異果就切片。
然後一層提子，一層奇異果，一層檸檬，再一層冰糖。然後再重複咁放，我只係放左兩次就差唔多到頂喇。所以就加層糖。確保所有食材都俾糖蓋到。

依樽就係完成品喇。本來諗住一樽搞掂哂（右邊），點知材料多到可以放多一樽細。
其實之前係買左邊依個樽嚟整，但買完嘢返嚟後，發覺太多材料，所以搵返個放冬菇既樽出嚟整。

隔左兩個鐘左右入去睇，啲糖已經開始溶喇。好心急想快啲夠14日可以飲。

Day 1
第二朝，咁至開始計第一日，多左啲液體喇。

 

隔左兩個鐘再入去睇，細嗰樽啲糖突然溶得快左。

Day 2
即係今朝，細嗰樽大部分糖都溶哂，好擔心面嗰啲材料無俾糖水浸住而發霉，所以即刻消毒筷子就將啲材料浸就落啲糖水浸住。
順手開一陣蓋，散吓啲氣，因為唔想啲酵素咁重酒味。

唔知係我成日整細嗰樽（噙日開蓋整過佢幾次），我覺得細嗰樽啲液體無大嗰樽咁清。細嗰樽啲液體濁一啲。