尖沙咀半天遊 - 中醫 + sogo

噙晚失落於抽LC紫煲系列後，今日就收拾心情出發到尖沙咀。

我終於都去睇中醫調理身體喇，其實話去睇幾個月，但拖到依家至去睇。
身邊朋友都介紹左唔少中醫俾我，本來都諗住去睇何樹勛醫師，但佢好似好難約，同埋每次都超多人去睇，我好怕要等好耐，所以一直遲遲未去開始睇。

最後有人介紹我去睇浸會大學既中醫，話唔錯，所以就去睇去喇。
我揀左去尖沙咀中醫藥診所，因為一陣要去TST SOGO血拼，所以位置啱哂。

由於今日第一次睇，所以醫師先開三包藥俾我試。如果無問題，就三日食完，如果唔得，就變成五日至食完。
因為我啲藥係補身，所以可以翻煲，每日飲兩次，但如果飲完覺得太補，唔舒服，咁就一日一次。所以要睇第一日食完既反應至可以決定。

今日終於搞清楚，中藥係唔係可以翻煲，以前啲醫師都同我講，啲藥唔可以翻煲，但今日依個醫師同我講，唔翻煲咪好浪費囉。因為我嗰啲係補藥，所以可以翻煲。如果係平時傷風感冒藥嗰啲就唔可以翻煲。

我今日既藥唔貴，可以話係我睇咁多個醫師最平嗰個。三劑藥都係$165，即係每劑都係$55（當然睇唔同既藥唔同價啦）。反而診金就要$300。
不過我見其它人比我仲貴，10日藥已經要$1000左右。所以我$465埋單，已經算抵。

我啲藥再要外加依包＂龜甲膠＂，依包嘢唔可以煲，所以煲起藥後，加入攪拌。

今日執藥位師傅仲教埋我點翻煲中藥，低能的我，一直以為煲完飲左，再用翻啲藥材再煲第二次就係翻煲。但原來咁係錯既。
翻煲既方法係，煲完第一次後，先留起碗藥，再即刻加水煲第二轉，將兩次既藥混和，咁藥性會平均。唔會第一次重，第二次輕。

我既電子藥煲又要出動喇。好耐無見佢喇。 

其實佢地有藥粉架，但我問左醫師，佢話煲藥功效會好啲，所以還掂都係，更係要好啲啦，所以揀要煲藥。（其實我老爺睇嗰個中醫都話煲藥係好啲架）

睇完中醫出發到Sogo，今日目標係Sofina既eye gel set，因為mammy早排去日本試過話好，但係佢地去左幾個counter 都賣哂，所以買唔到。
今次感謝日咁啱有做依特價，但只有TST Sogo有，所以就去TST，如果唔係我想去銅鑼行多啲，大啲，多啲嘢睇嘛。
我買左3 Sets，mammy, 家姐, 我每人一set.
依度好細，又人多，加上今日狀態不佳，所以買完行左陣好細既超市後就去搵嘢食。都唔明點解以前可以係感謝週時，不停穿插唔同counter搵護膚品。年紀大喇，唔願行喇。