韓國Eiffel Freshpack抽真空機

一月份其實仲買左部抽真空機，因為係Join group 訂，由韓國訂購回來，所以到攞機嗰日至同老公講，老公第一個反應係......... 我地真係咁多嘢要抽?? 多到要買部機返嚟??
當時更係無答老公啦，因為都係半貪玩又好似有啲用，又見唔貴所以買左返嚟至算。但估唔到真係幾好用，好到本來諗住借俾家姐包馬蹄糕俾朋友，但老公主動提出再買一部送俾家姐。

拎到返屋企即刻拎啲蔘出嚟抽鬼左佢。好易用，又幾好玩。
順手拎埋雪櫃已經開封既食物出嚟封返口，因為老公好怕雪箱味，所以封返口無咁容易吸味。我覺得唔錯吖。機背又有磁力，可以吸係雪櫃或微波爐頂，咁方便隨時拎出嚟用，方便好多。

好彩新年前拎到部機返嚟，所以新年期間將屋內所有蘿蔔糕，馬蹄糕按每次食量分開嚟真抽包裝，咁容易儲存，雪櫃多返啲位，啲糕又無咁容易變壞同吸味，又唔會整到全個雪櫃都係蘿蔔糕味，我覺得真係無買錯啦。