忙碌的新年前夕

雖然年三十已經放假，但由於太多手製食品要安排，所以行程排得滿滿。覺得好鬼忙。
好彩媽咪今年要湊孫女，所以提前 2月15日(星期日) 已經整蘿蔔糕，咁我多返年三十整自行送禮既鳳梨酥。咁安排會好好多。

由於今年老公公司好忙，所以新年前好多嘢都要我自己嚟安排，好彩一早知道得自己搞，所以可以分開好多日嚟慢慢搞，慢慢買。
不過自己一個人走去買16斤蘿蔔真係有啲吃力。不過好彩媽咪一早準備好哂其它材料，上到媽咪屋企已經全部切粒。咁我無咁多嘢搞。

依張相係我地正式整前，整幾底俾老公食住先，解解佢既蘿蔔糕引。

我地由12點多買嘢，整到 5點多 6點至可以蒸，蒸到11點多至全部蒸完，真係蒸到人都癲。媽咪仲要宣布下年退休，要我接手整哂佢。咁.......... 我諗我下年真係會買蒸爐，一爐可以蒸6~7底，咁會快手好多。但到依家都未出現一部我同老公都同時滿意既機，所以希望今年內出現一部大家都滿意既機啦。

依度只係第一轉既份量，之後兩轉既份量全都放入大盤內，因為我家係蘿蔔糕精。

同一日，家姐就在自己家中整馬蹄糕。份量好多，因為佢要整俾好多人啦。

而我，年初一仲忙緊焗鳳梨酥。真係好鬼攰。因為頭兩日（初一及初二）係最忙，要周圍去拜年。所以我諗下年都唔會再自家製喇。雖然親友都鍾意食依款鳳梨酥。
年廿九晚煮個鳳梨餡最初一直用慢火，半瞓咁煮，煮左成五個鐘，之後真係想入房瞓，所以用大少少既火快煮就大半個鐘搞掂，早知一早用中火咪唔洗搞咁耐囉。好彩年三十唔洗返工，可以瞓到自然醒至起身整個酥皮，晚上食完兩轉團年飯（奶奶家同自己家人）就回家焗左兩轉鳳梨酥夠明早送禮就入房瞓，因為年初一要早起回奶奶家食飯。所以真係好鬼攰，新年放假仲攰過返工。好彩新年假期較長，初八至返工，可以瞓返夠本。

因為太忙，所以今年由老公獨自自己一個包利事喇。今年係第三年派利是，跟以往一樣，最親既都會特別買一啲特別既利是封嚟俾佢地。啲利是封真係好鬼靚。