本來諗住老公生日當晚去果欄買新會柑，但飯後已經攰及怕晚上果欄啲人忙於上落貨，怕阻住佢地，所以第二日至買。但當晚已經買定左報紙，唔理喇，照入依個日子入樽啦。hahahha....
第二日星期日下午三,四點都果欄，其中一邊會較多舖頭有開舖，但有權記新會柑既就不多，而且沒有現貨，需要訂貨第二日取。當日好似只見到一間，可能晚上全部舖會開，就容易搵一啲。
所以只好訂貨，老公星期二晚至得閒幫我取。老細仲問點解遲左一日取，原來佢訂左邊日取，就會留俾你，唔會俾新返既貨俾你。不過都係相差一日，無所謂啦。
我聽人講用權記新會柑嚟曬果皮質量較好，所以即使其它牌子有現貨可以即場取走，我都寧願多等一天。
權記新會柑一箱：HK$250.00
權記新會柑。除了紙箱有他們LOGO外，箱外膠索帶及封箱膠紙也有記認。
每一箱有 15公斤。粗略數過大約有150多個。
箱面的柑較大，中間有些較小隻。
大隻跟小隻的對比圖。
為左曬果皮，一早已經準備好用品，毛巾，繩，Cutter及手套。
老公話啲柑酸，所以事前提我一定要帶手套。
點解要準備毛巾，因為要用只有少少濕既毛巾抹干淨啲柑。估唔到真係咁污糟。其間已經忍唔住洗左兩次再抹，本身塊布是全新的，抹完就變成咁。
其實本身有諗過俾錢，叫果欄啲阿姐幫手開果皮，因為自己唔識開，而且，只係需要拎啲皮回家即可以，好似方便好多。
但諗到無得自已抹柑皮，好似將來用都無咁放心咁。所以就決定自己一手一腳自己整，由頭到尾自己整，開心好多，啲果皮亦都珍貴好多。
抹過既柑皮，光亮好多。但好似聽人講，只可以用微濕既布嚟抹，唔可以整得太過濕。
網上好似沒有詳細教人開果皮既方法，所以睇左好多篇後，得出應該係由底十字界四下。
然後原住界開既邊慢慢開。比想像中容易，但有時掛住睇電視邊開，都有整爛幾個既皮。
綁上繩既方法，我就搵返上年買嗰串果皮出嚟偷師。
每一片入繩也是相反方向串入，每兩片之間打一個結，以確定有足夠空間俾佢地曬干。
由於是weekday整，只有晚上收工後有時間，所以要分開兩晚嚟整。第一晚開左兩串左約100個，已經有兩大盤柑喇。
本來想掉左啲柑肉，但老公話好浪費，叫我搾成柑汁俾佢飲，最後，一箱既柑肉，就變成以下五樽柑汁。仲要係已經隔哂渣。如果唔係仲多。
不過媽咪話苦澀味，同埋曬果皮既新會柑係要皮唔要肉，啲肉唔識合食及飲用。
沒有留言:
張貼留言