老黃瓜湯

唔愛好飲湯既老公，突然話想飲啲袪濕既湯水。
個人嚟講當然覺得葛湯較好飲。但問題在於葛湯好複雜，之前想飲都係突登叫媽咪煲，對於太耐無煲湯既我嚟講葛湯太高難度喇。(依兩年都係用湯包多，每包已經執好哂材料，只需要加舊肉即可)

問過朋友，佢地介紹我煲老黃瓜，未煲過依款湯既我，當然又出現一大堆問題出現啦。
例如：黃瓜點分老嫩，應該用乜嘢肉嚟煲之後都仲滑可以食既。返到屋企打開雪櫃，差不多見到乜嘢都落鬼哂落煲湯度，本來仲想落埋龍眼干，但怕唔合適，所以忍手無落。

煲湯材料：
老黃瓜
赤小豆
意米
扁豆
南北杏
蜜棗
豬展

份量我都係亂嚟，藥材店有一包是包好的赤小豆+扁豆，我就全包倒鬼哂入煲，唔知係咪落得太多，我覺得煲湯有種我唔多鍾意既味道，但又講唔出係乜嘢。

老黃瓜，朋友幫手問了家人。
選老黃瓜要選深色，皺紋多既。去左一檔較有信譽既菜檔，見佢寫明係老黃瓜，就乖乖俾錢喇。

切開左舊瓜後，又出現一堆問題，點解咁青綠色，味道好似青瓜香味。需唔需要去中間啲籽。不停回想平時飲瓜湯係點，最後唔理喇。去鬼哂中間啲籽。

煲左兩個半鐘左右，老公返到屋企就飲喇。
滾左之後就轉左最細火嚟煲，中途無理過佢，打開蓋差不多無少過水，所以我真係好鬼愛用staub 嚟煲湯。