IDEALE CHEF 煎PAN & Euro Cook鑊

星期五收工，去左公司附件間意美廚開倉度睇下有無煎PAN啱用。因為屋企隻煎PAN 係易潔煎pan，如果面既塗層甩左，再繼續用會致癌，所以想買返個唔係易潔既pan。

睇左一陣，揀左依兩款，sales ee 都話依兩款係陶瓷物料，即使面嗰層甩左，再用都唔會釋放致癌物質出嚟。價錢又吸引，所以俾埋錢，唔洗十分鐘已經走得。
(返到屋企至詳細望個盒寫乜，兩隻都係寫aluminium (鋁)，咁其實邊part 係陶瓷呀?? )

小小的煎pan，其實都有24cm。但跟我依家用緊嗰隻30cm比較。感覺真係好細。但有時煎少少嘢，細隻啲都ok 啦，同埋個邊較淺，如果煎蛋，倒返入碟會較方便。
最重要價錢只係 $78。（無額外折購，因為好似已經係特價）

依個pan個面層有啲似上年工展會睇中既款，都係有一點點好似雲石面層咁。

估唔到賣到咁平，仲有個不織布作包裝至入盒。（其實我都唔知原價是多少）

另外，再買多個大少少既鑊。咁有時炒菜，炒飯，煎餃子都方便啲。
（因為老公唔會用我啲LC 同Staub，所以都要買返啲較易用既用具俾佢既）

依個係32cm，仲要係我大愛既紫色。
好似已經係特價$228，仲要因為盤點清貨，所以額外再有88折，折完好似係$201。
返到屋企睇個盒，至知道依個鍋有成6L。咁咪容量仲大過我啲Staub ??

星期六好早起左身，無乜嘢做，就煮左個豐富早餐同老公一齊食，好鬼飽呀。