韓式炸雞

早排中左星星毒，又食過荃灣好味道既韓式炸雞，所以見到網上有人教整即刻Bookmark 左個食譜先。其實一早已經想整，但因為一直未買到粟膠所以一直等等等等。

終於搵左一日捉左老公同我出TST 韓國街度買埋粟膠就可以動手喇。

食譜來自"家嫂的廚房"
http://lacuisinedeamy.chiba78.com/articles-19285.html

韓國炸雞 (參考小小米桶) 2人份

材料:
雞塊 (可以選雞胸，雞翼，雞腿）2大件切小塊  (我今次用雞翼嚟整)

辣醬汁撈雞:
蒜蓉 1 teaspoon
醬油 1 teaspoon
韓國粟膠 1tablespoon
黑椒粉
韓國辣醬 1~2 tablespoon
茄汁 2 tablespoon
麻油 2~3 teaspoon
水 1~2 tablespoon

做法:
1. 雞塊預先用額外1 teaspoon 蒜蓉, 1 teaspoon 生抽, 少許糖, 黑椒粉醃一晚

2. 要吃炸雞時，便制作辣醬：韓國辣椒醬，蕃茄醬，水及韓國粟膠混合備用。
　然後用小火下麻油煮蒜容一會，再加入混合的醬料煮至濃稠，待用。


炸漿：　
雞蛋 (打散)，地瓜粉，麵粉，生粉，小蘇打粉

3. 制作炸粉，地瓜粉，麵粉，生粉以２：１：１份量混合，再加入小半匙小蘇打粉

4. 雞塊沾上粉後，再加一隻雞蛋，拌勻。

5. 燒熱一大煱油，先把雞塊炸至微金黃，盛起放在廚房紙上。

6. 全部雞再放回油鍋中再炸，盛起，炸2次外皮脆一點。


因為之前搵左幾間都唔見有蕃薯粉買（即地瓜粉），所以一見到有即買。
但行多幾間，發現佢地買既同我依包有啲唔同，其它舖買既較幼滑，我依包有啲較粗粒，要用少少時間拌勻至可以用嚟炸。

今次用左豬豬煲嚟炸，係細左少少，每次只可以炸5~6隻。但慳油啲嘛。
而且，用Staub炸嘢真係好好，開最細火力已經有以下效果，又keep到油溫，勁滾呀。
同埋之前用個煲，每次用完都係好干，點養點用都唔靚，今次炸完之後即刻油潤哂。

買嘢時順手去左印尼舖度買嘢，見佢有木薯粉又買埋，佢地教我用依隻木薯粉（少少）加以下依隻炸粉嚟炸雞翼，都好好食，其它嘢乜都唔洗再落。

由於都怕個韓式炸雞整得唔好食，所以都係分散投資，每樣一半，所以同場有一半係依隻炸雞翼。依隻炸粉只需要同少少木薯粉混合，然後將已經腌好既雞翼抹干，印上已經混合既炸粉即可以拎去炸。
老闆果然無介紹錯，依隻炸完出嚟好香脆。

我地既晚餐，炸雞兩碟。

之前一直想買PHILIP 部AIRFRYER，但老公話我地都好少整炸嘢食，而且廚房又無乜位，所以一直都無買。但係整過炸雞後，又發現維他有promote，可以以超抵價$549換部gemini無油煎炸鍋，網上見好多人都換左，評語都不錯，效果跟philip 嗰部差不多，只係無配件可以加，同老公講多兩講，佢都話換一部返嚟玩吓，不過我因為都係趕尾班車嚟換（promote 已經完左啦 )，所以所有現貨已經俾人換哂，要等下一批，應該八月至有貨，咁依段時間，我就慢慢執下個廚房，生個位置出嚟放置佢啦，期待中。