無咀貓之夜下場 + 咖啡弄

食完拉麵就即刻跳上的士過大坑。好近，係拉麵店過去都唔洗跳錶。
去到大坑，又係搞唔清方向，搵左一陣，終於忍唔住去左洗衣店都問人既店舖位置，原來係佢後街再行前少少就係。

離遠已經見到有人排隊，但唔算人多，都諗住應該無問題啦。
點知行到過去諗住攞飛，至見到話今日既籌已經派哂。唔係嘛，我地仲特登走過嚟 tim。之前諗住打電話過嚟問有無籌又無人聽電話喎。
不過我諗就算攞到籌都要擔心無cake 食，因為有位已經搵籌既男士一直望實個蛋糕櫃，因為櫃內既蛋糕越來越少，又唔俾佢先留起，佢勁擔心佢入座時，已經無哂蛋糕。
由於無位，所以我地影左少少相就行返去銅鑼灣向咖啡弄出發。

去到咖啡弄諗住得幾個人排隊啦，點知原來我地見到既人係排緊walkin，上面原來仲有一班人係已經攞左籌既。但我地見唔算人多，又得閒，所以就照排。點之....... 唔覺唔覺，我地最後排左成45分鐘，後悔死我，隻腳勁攰。

十點前可以入座。本來想叫兩款甜品，但又怕大飽，所以每人叫了一款飲品再加士多啤梨waffles。由於戒緊咖啡，所以就叫左蘋果檸檬水果茶(好似係咁既名啦)。
感覺上，間舖啲嘢都痴痴泣泣，佢地抹完張枱都仲係痴手既。可能間舖係食甜品卦，啲抹布成日抹完甜嘢，所以好痴手。
waffles 剛嚟到時仲係熱既，好香，好好食。但如果放耐左，凍左就無乜特別。同埋都幾飽肚，我地兩個share 都食唔哂。
水果茶好好飲。同埋都算keep溫度算keep 得耐。