紙婚之放－台北DAY 3 – 13-JAN-2014

最後一日，終於可以瞓得晏少少，10:30至起身沖涼，執嘢準備checkout。

本來依個trip都預左無乜嘢買，所以兩個人都只係帶左個細喼，點知又買枇杷干，又買左薑母茶，又kitty碟，都幾阻地方，都花左少少時間至執好行李。

11點多已經到lobby度checkout，想去搵西門町一檔街邊檔既胡椒餅，好好食架，但幾年無嚟過台灣，唔知係咪已經無做，搵唔到喇，都幾失望。

跟住問老公想唔想食小竉包，佢立即話食啦，所以即刻坐捷運過去，行經西門町又買木瓜奶，又買左兩頂帽，老闆自己降價，每帽原價NT$490，最後NT$800就有哂兩頂。

去到鼎泰豐都等左一陣至有位，因為有旅行團同香港學生既遊學團，所以等位時間長左少少。入坐前已經點好菜，小竉包好快已經到左，我去完洗手間出嚟已經係枱上面，食完小竉包至上碗擔擔麵，老公勁後悔唔點兩竉小竉包，而怕太飽而選其中一樣係擔擔麵啦。

跟住行下附近，竟然發然我上次嚟食過一次好好食既粉圓，立即拉老公過去再食，間舖裝修左同大間咗，味道依然好味，咁下次再嚟食完鼎泰豐我就記得附近有間＂東區粉圓＂啦。

食飽飽就周圍行，順手去買手信，本來都唔諗住買，但老公話叫我買返公司，其實公司都無人知我去左旅行啦，因為只係請左一日假，唔出聲真係無人知，但佢話我依排咁忙仲請假，買返去請老闆同埋同事食喎。所以就走去搵好味道既微熱山丘喇。行左一個車站路程左右，唔識點行，咁啱問著個坐係路邊吹水既的士司機，佢話都幾遠，所以就跳上佢架車過去喇，都真係幾遠，絶對唔接近捷運，坐左NT$120的士，可想然知有幾遠。但回程問左店員，原來有巴士回西門町，坐12號巴士就係酒店隔離街落車，都係大約半小時左右，都幾方便。

依間既鳳梨酥已經聽過人講好食，亦搭過谷友買過返嚟hk俾老公食，佢都知道依間好食，所以要特登走過來買，都無乜異議。

一到店舖，店員會請我地坐低，然後就送上一杯茶及一件鳳梨酥。（掛住食同計要買幾多盒，食完至記得影相）

依間既鳳梨酥有乜嘢吸引？？咬開後，你會見到一絲絲既菠蘿肉，味道帶少少菠蘿既酸及香味，而個皮係我喜愛既曲奇皮味道。

鳳梨酥得三個包裝，十件（NT$350）, 15件（NT$525）同埋20件 （NT$750）。即係每件都係NT$35/件，無話買大盒啲會抵啲。但我地撞啱係新年前，所以買既係新年包裝，印象中，應該係內層既通紙由啡色變成紅色，而麻布袋變成紅色不織布袋，無乜其它特別。

其實佢地仲有菠蘿汁，但我未飲過，同埋怕重，所以無買嚟試。本來問過酒店可以代訂，但要預三天時間俾佢地送貨，所以只好自己走過來。

返到酒店太約3點多，拎返啲行李就出發到台北車站那邊的三越，先到12樓寄存行李，然後就到10樓買LC啦，有部份產品半價，如果無折，台灣買LC都幾貴，一定貴過HK，所以我只係睇特價品，買左四個碗，跟住拎住行街都幾重。

飯碗折後NT$440；湯碗折後NT$490。最衰湯碗無紫色啦。

買完嘢都仲有一個鐘時間行街，所以又周街食嘢。依杯桃多多都係NT$35（700CC)，即係HKD10都唔洗，但個杯同我塊面差唔多大，好鬼抵飲。

5點就過去買車票到機場，40分鐘左右就到喇，之前又叫細佬幫我網上checkin揀位，係機場都幾無聊，早知係台北行多一陣至嚟機場啦。今次一喼去，返去一開四。

7:30準時起飛啦，台灣BYE BYE 喇。