新年必備食品 - 蘿蔔糕

由細到大我地都被Mammy寵壞，每年都會親自整蘿蔔乾糕俾我地食，有時整得唔好仲要俾我地彈，下年要唔好咁稀，唔好咁硬，唔好咁咸。乜嘢評語都有。有好幾年佢都想懶唔想整，都會因為我地強烈要求而又再整。近依兩年，細佬都會出手幫媽咪整大部份嘢，等佢唔洗咁辛苦，一個人要蒸成8-9底(仲要係大盤)，其實真係幾攰架。

而99近兩年都忙住揍孫，都無整蘿糕啦。講真，食開自家製既蘿蔔糕，真係食唔慣街外既蘿蔔糕。始終覺得無咁好食。
以往同老公每年新年可以食3-4底蘿蔔糕，由於近年失收（少左99既兩底），我地都要慳住食。

今年老公突然提出叫我整俾佢食，仲話會幫我刨蘿蔔，因為刨蘿蔔最花時間。其實前幾年都整過一次俾佢食，但因為太花功夫，而且我又無咁快收爐，所以都係整左一年就無再整喇，平時有時間都係協助媽咪整多。
但今年佢提出，亦都想媽咪休息吓，所以今年蘿蔔糕決定由我負責。見谷友介紹團購刨蘿蔔機，同老公講都想買返一部，都係$400幾蚊，用到兩，三年乜都抵返哂。但團購要1月24日至有得攞，仲要走到過銅鑼灣，最怕第一日唔夠貨又要等到唔知幾時，最後淘左一部機返嚟。牌子，唔知係乜，但睇佢介紹既片，套入唔同刀片，可以刨到唔同既嘢都唔錯，所以就試吓，大約HKD320左右。部機比想像中大部。嚟到係一個都唔細既紙箱，裡面仲有兩個紙盒，一盒放部機，一盒放刨嘢既配件，有五個刨嘢既配件可以選擇。

跟機係兩腳插頭，老公幫我換返三腳插，本身諗住自己刨，但部機都幾嘈，同啲刀片都幾利，所以老公唔俾我刨，佢刨哂至再交俾我，幼絲要2/3，粗絲要1/3。老公話刨粗絲好快已經刨完，可能個孔較大，所以都較快卦，刨三斤蘿蔔都係五分鐘左右，老公一邊刨一邊話抵用，真係快好多，因為以前老公都會幫99刨蘿蔔，所以都知幾花時間，仲要好容易出現血案。

本身諗住下星期年三十晚至整，因為嗰日應該已經收左爐。同埋我地會放冬菇，放左冬菇較易壞，唔可以放咁多日。但噙朝老公話，不如係偉大工程前，試整少少先，失敗左都無咁甘（因為真係好幾年無整），同埋佢真係已經好想食喇。所以即刻走去浸冬菇同蝦米，由於今晚要整，所以我用暖水浸冬菇，用暖水浸會快少少軟。

我由晚上八點左右開始整，洗洗切切，整到都成11點至完成可以入盤蒸，今日只係試整一個份量（倒出嚟有兩個錫紙盤份量）。蒸完出嚟老公已經忍唔住要食，一食就無左1/4，仲要不停叫佢唔好食咁多至停，因為有一底會俾媽咪，即係依一底我地要食幾日至會有下一轉。因為我唔想中途又要再整啦。

今次試整，老公非常滿意，但我覺得好似唔夠料咁，不過我屋企唔習慣再係糕面度放料，其實我都唔鍾意，因為切開嚟煎時，放面既料會跌哂落盤散開哂，所以溝埋入糕內好過。