臘味蘿蔔糕

依個食譜跟左我媽咪好多年，全部親友食過我媽咪整既蘿蔔糕都讚好。所以今年特登問佢攞此秘笈嚟整。
以下一套份量，大約可以整到兩個9"5寬既錫紙盤。

用料：
清水 ............................... 四杯
白蘿蔔 .......................... 三斤
臘腸 ............................... 四條
臘肉 ................................ 四兩（150G）
蝦米 ................................ 二兩 （75G）
冬菇 ................................ 五隻
干瑤柱 ........................... 1 ~ 2粒 （可以不落）
粘米粉 ........................... 十二兩 （450G）
鷹粟粉 ........................... 四兩 （150G）
片糖 ................................ 一塊
鹽 .................................... 一湯匙
豬油 ............................... 三湯匙 （可以不落）



調味料：
生抽 .............................. 一湯匙
糖 ................................... 一茶匙
雞粉 ............................... 一茶匙半
麻油及胡椒粉 ............ 少許


做法：
1.　蘿蔔刨成幼絲，放在鑊中，加水四杯煮焾，再加入片糖一片，鹽一湯匙。
       趁熱時加入粘米粉，鷹粟粉搓勻，要確保所有粉已經搓勻，不會出現無粉團。
     （因為熱水加粉，做成糕之後更好吃）

（粘米粉今次買左以前未用過既李祥和，因為人人都讚用依款更好食，但老公試左覺得無乜分別，另外又見又人講李祥和其實已經執左幾年，依家買到嗰啲係假貨，因為李祥和要成$15/包，平時用開嗰款三像牌至係$7/包）

2.　臘腸，臘肉均切成幼粒，冬菇，蝦米浸軟洗淨，也切成幼粒。

3.   將油二湯匙放入鑊中，炒臘腸，臘肉等幼粒。並加入調味料，豬油拌勻。

4.　放在鋁質圓盆上，隔水蒸一小時半，取出用筷子插入糕中，如不膠黏，即成。

屋企無鑊，好彩個蜂巢鍋可以放得落嚟蒸。

備註：
干瑤柱，豬油，冬菇都可以隨個人喜愛而落。
但落左冬菇會較香，但會容易變，唔可以放太多日。
而干瑤柱，今次都無落，因為發現屋企樽瑤柱已經發霉都未買返。
而豬油，想食得健康啲，當然唔好落啦，同埋我都唔知係邊度搵豬油。
如果係送俾親友，可以多安排一些臘肉，臘腸，冬菇等放係糕面，賣相會靚仔一啲。
但因為我地自己人食，所以全部配料溝埋入糕內蒸。