今朝5點半老公就叫醒我，點解要咁早？？因為噙日發現7-11有Hello Kitty碟換，但噙日已經被人換哂，店舖話今朝應該會翻貨，但一定要早，最好六點左右嚟，如果晏左好多時已經俾人換哂。印花其實噙晚已經儲齊（我選擇儲五個再加NT$119嚟換)。
酒店對面已經有一間7-11，但問了，說今早翻的貨品沒有碟，所以去埋附近四～五間再問，但都係無，已經打定輸數，最後一日都無就換杯算。跟住去附近店舖買痴飯+豆漿返房食，老公食左都讚話好食。食飽飽睇一陣電視再瞓。跟住九點就起身沖涼又要出門去九份喇。
原途見到有7-11老公都會走入去問下有無隻碟換，佢唔識講普通話架，問左我點講就自己走去問，台北車站四個角落都各有一間7-11，竟然問到第二間話仲有得換，仲要有10幾隻可以換，所以立即先換一隻，估唔到換一隻後佢又俾左兩個印花我，跟住又想換埋俾家姐同朋友，但我地今日出發去九份，路途都幾遠，但印花又要買嘢至有得攞，最後老公話買金紗朱古力嚟儲印花，因為較細件又輕一點。我地係櫃位搞左好耐至搞掂換多兩隻。本來都想聽日臨走至過嚟換，但又怕俾人換哂，所以今日就枱住三隻碟遊九份+十分。講真都幾重架。
因為換碟用左唔少時間，本來可以坐定定搵間餐廳食嘢既，依家變左得返20分鐘食嘢，所以最後買左個鐵路飯盒嚟試。Um.... 講真，味道一般，但價錢平，只係需要NT$80就有個飯盒。當試吓新嘢囉。
我地因為早買車票，所以有位坐，都成50分鐘車架。但見有老人家，所以老公讓左個位俾老人家坐。好彩依班係快車咋。有好多站都飛左唔洗停。到左瑞芳站就問人點上九份，可以選擇坐巴士，班次都幾密，但老公見坐的士都係NT$180，所以選擇舒服啲咁上去，佢頭先企左全程火車，都好攰喇。的士司機都不忘推介我地租佢五小時，費用打折後NT$2,000，但因為我地唔想限住時間咁玩，同埋我想試下坐火車去十分，所以都係選擇自己去。
老公第一次嚟九份，佢對依度印象都唔錯，因為多嘢睇，店舖又集中，行下食下嘢，無咁悶。
老公一見有魚羹就話想要食，佢話噙晚已經想食，但見唔多吸引所以無食到。
跟住又食左花枝燒，老公自己問，自己叫架。幾勁。
噙日行左半日，搵左好多度都搵唔到依款枇杷干，估唔到依度有得買，因為99鍾意食，食完喉嚨舒服啲，所以一買就買左六樽，NT$1,000/3樽，個女仔可能見我地無講價，所以自動送多一包俾我地。不停介紹我地可以點食，又俾左放左7年既枇杷干我地試，老公都讚好食（其實佢食前好怕會肚痛啦）。其實依樽嘢香港都有得買，但買得貴好多，要HK$160左右一樽，所以姑奶叫我地見到就買返去。
見到一條長樓梯，又走上去八下，有間舖專買懷舊糖果，好得意。
再行上去，就見到好出名既＂阿柑姨＂，但太多人喇，所以懶得排隊。
最後同老公搵左間有露天既餐廳坐低飲嘢坐吓，欣賞下九份。但坐低後開始落微雨，越來越大霧，最後乜嘢都睇唔到。
回程我想試下坐巴士，但因為我地用悠遊卡，所以我都唔知車費係幾多，估唔到係九份我地都行左兩個幾鐘。一落到瑞芳就去車站買去十分既車票，仲有半個鐘至開車，所以又走去Cafe買杯嘢嚟飲，叫左杯特濃朱古力，好好飲。
過去十分車程大約30分鐘，好彩有位坐，本來已經停雨，但途中開始又落雨，都擔心放唔到天燈，到站後仲要越落越大，但都見人地都繼續放到，所以唔理喇，同老公搵左一間，揀左天燈顏色就密密寫喇。我揀左紫色，寫完工作人員就帶我地到火車軌，一個幫手點火，另一個就幫我地影相，超快手，仲要追到天燈放上天既時候。
因為落雨，所以放完都諗住走，本想坐4:50既車，但可能落雨，好多人都想上依班車，估唔到我地上唔到車，跟住下一班車要等到5:38，差唔多一個鐘呀，因為怕下一班車都無位上車，所以留係車站度等下一班車，好彩有帶暖包。無咁凍。下一班車成功上車，但都幾多人，又無位坐，背包既碟覺得越來越重，而老公仲要拎住六樽枇杷干，仲重。最估唔到佢地依啲火車都幾失敗，我地由十分回台北車站差唔多用左兩個鐘，其實班車停係站讓其它車先行，應該讓左差不多20分鐘。所以下次唔係包的士，我地都唔會選擇再去依度。
跟住返酒店沖涼，休息一陣，九點左右又出發到市林夜市食嘢。但經過阿宗又食碗麵線先。之後之坐捷運過去。
沒有留言:
張貼留言