老公訂左7:30AM機，所以未天光已經要出門口，好彩有細佬車我地去機場。之前一晚我已經網上Checkin揀左位，所以我地都成6:30至到機場，慢慢過關，睇下嘢就可以上機喇。
之前都試過自由行嚟台灣，但都有其它人同行，第一次自已兩條友去旅行，我今次真係乜嘢功課都無做過，我連點坐車，去邊度坐車都唔知，好彩老公做足功話，好快已經搵到巴士去台北車站。大概40分鐘左右已經到達台北車站，第一件事就係買定明天到瑞芳既車票，因為我想帶老公去九份，而又想去十分放天燈，我未去過十分呢。本來想買11點幾班快車，但點知賣哂，所以只好早一班慢車，變左10:15車。
跟住就去酒店，老公話西門町間酒店唔多近捷運，睇地圖係兩個站之間，所以我地就行去，見到有葱抓餅又買嚟食，飲埋豆漿都飽飽地（掛住食，無影相啦）。
行行下，老公發現我地其中想去既相機街原來就係車站同酒店之間，所以就諗住最尾嗰日至行。
好快搵到間酒店，原來係伊樂園酒店對面（以前叫一樂園），係用舊樓改建，講真外型唔多得，但因為新改建，所以啲嘢較新同干淨。同埋原來要三點至可以Checkin，所以放低啲行李就出去行街喇。
老公話想去食度小月，睇下係咪真係咁好食，去度唔算太多人，等左一陣就有位，我地每人叫左一碗擔仔麵同粉。其它嘢唔多吸引我地食，食完都飽飽地，可能今朝杯豆漿飽肚，如果唔係真係想去埋對面鼎泰豐度食埋小竉包，老公好鍾意食小竉包啦。
跟住就周圍行街消磨時間，去左今朝見到谷友介紹既natural kitchen。間嘢係內街，都有少少難搵。入到去大部份嘢都係NT$50/件。好快已經搵到谷友介紹既花花小碗。都幾失望，全部上色都唔均勻，一撻撻，行左一個圈拎左上手都係放返低，但老公話一場嚟到，又唔係貴，咪照買囉。本來都想買碗，但諗起屋企真係幾多碗，同埋想買LC既碗多啲，所以忍手。
跟住諗住再去糖妹介紹既華山，但行左幾條街都唔見，所以最後都係坐的士過去，原來我地行離左捷運條路，唔怪得搵極都搵唔到，同埋都離幾遠，都坐左成NT80的士（台灣的士其實都算平）。去到華山都幾失望，因為本書介紹話有跳蚤市場，會有地攤檔，但去到只見人頭湧湧，大部份都係藝術既既嘢，又人多，同埋當時已經幾攰下，所以搵左間CAFE坐一陣食少少嘢就返酒店休息。返到酒店至係五點幾。
老公瞓到9點左右就起身同我去華西街既夜市度食嘢，其實都幾近西門町，只係坐一個站就到。依度有一檔燒腸仔幾好食，好似都係NT$35左右。另外，又食左碗粉圓同西瓜汁。
行左個圈，想食既都食左就回程打算返酒店，因為今日都幾攰，但一出西門町捷運站，又走左去買炸雞粒返酒店慢慢食，店員知我地係香港嚟，又講啲唔減唔淡既廣東話，真係笑死我地。
依間就係我地住既酒店，間房比網上睇細間左，但老公話紫色地毯係我鍾意既顏色，本來仲有KITTY房，但KITTY房只有兩張單人床，所以揀返普通房，地方因為新，所以都干淨，房間大小對我地唔多重要，最重要係干淨，如果污穢同舊，間房幾大都無用。
沒有留言:
張貼留言