旅行前的準備

好耐無試過同老公一齊去旅行喇，其中一個原因係家中有兩隻狗，佢地習慣只係見到我地，所以如果我地去旅行，最大煩惱係佢地，因為怕佢地唔習慣，又要 諗邊個可以幫我地睇住佢地。最好當然可以放哂兩隻係一齊住啦，但佢地兩條友仔一齊去到陌生地方就煩到飛起，所以最後決定，一隻去我媽度，另一隻去99度。
冬瓜（哥基）係細佬，但最霸道同最嘈係佢，放佢係我媽度就啱，幾嘈都唔會有人投訴。因為我媽住唐樓，又有個大天台俾佢跑。

仔仔（松鼠）係哥哥，跟左我地12年喇。每晚都跟我一齊瞓，所以出發前最擔心係佢，因為無得跟我瞓，佢又老喇，最怕佢唔習慣。

前一晚同老公返99屋企度食飯，順手帶埋隻狗返去，本來佢都好開心架，但見我地走又唔帶佢走就嗚得好勵害。心痛死喇。
之後再返屋企帶埋細佬去我媽屋企，先上天台俾佢跑，佢玩得跑得好開心，但到我地出門時，佢又係嘈得好慘。不過我唔太擔心佢，因為佢好快習慣，會將屋內所有人都好似欠左佢咁，要服侍佢。
返到屋企好快已經執好行李，跟住襯佢地唔係屋企，順手清潔埋間屋，想抹鐵閘好耐，但如果冬瓜係屋企，我開唔到木門清潔，因為佢一定會吠，佢可以話係好有規律既狗，佢唔鍾意改善，屋企地下突然放左好細件嘢出嚟佢都會發現。


https://www.facebook.com/XiaoBaoYuXiaoDong