仔仔走左喇！

林仔仔同我地一齊生活已經有 13年喇。
一直都係好懂事，又黐我。雖然有好多時會發脾氣周圍屙。但大致一直都係聽話。所以一直深得我痛錫。

寶寶於2015年12月21日大約早上8:35離開。（星期一）



當日按照平常一樣，我起身返工就帶埋佢出房俾佢去廁所。我就去廚房準備佢既早餐。
返到入廁所，佢已經自己去埋大，但就好攰咁撻左係地下，所以我就要再抱佢起身俾佢食早餐。但好奇怪，今朝佢唔肯食嘢，我以為佢唔知拎左野俾佢食，所以已經用手拎少少俾佢，但佢都唔肯食，所以無辦法，放佢自己係地下，等佢自己食。
但我沖完涼出嚟，佢都係無食過嘢，只係身體轉左方向。因為前一晚佢係我地瞓緊覺時，應該差不多嘔左大半罐狗糧出嚟，而依幾日又咳左 3日，所以我沖涼時已經諗住約兩間診所，邊間有得早啲睇，就同佢睇邊間。
點知係我抱佢上枱，諗住幫佢換過第二件衫至再抱佢返入房瞓，幫佢除衫時，佢好似有啲緊張，所以同佢講係媽媽嚟，叫佢唔洗驚，除完衫就發現佢口角有啲粉紅色液體，立即攞廁紙及抱起佢想佢抹走液身，寶寶身體就突然間癱軟，口中流出血水。我立即眼淚好似失控咁不停喊。我完全唔知可以點做，因為寶寶係我懷中完全放軟，但又會突然間抽搐幾吓。
我只係抱住佢不停喊，老公都被我喊聲嘈醒左，佢本來係房都唔太確定，但出房聽到我喊聲都估到係小寶走左。

老公叫我先放小寶係枱，佢就清理地上既血。見寶寶會突然抽搐數下，雖然都知佢已經離間，但仍想抱一絲希望可以有人話我知，其實佢未走。
但係，過多一會，佢身體已經完全靜止，但我好似仍然感覺得佢有心跳咁，要老公幫我確認。
老公知我唔捨得小寶，所以叫我抱住小寶出廳到坐。我抱住小寶不停喊左差不多一個鐘。之後都間唔鐘會不停狂流眼淚。

本來老公諗住帶埋小寶近期常用既物品一齊帶到天水圍，搵個山頭埋左佢，因為仔仔係我地以前住天水圍時執佢返嚟，所以佢想俾佢返去原來地方。
但係我唔想，我唔想佢俾其它動物咬同由佢自己一個係度腐爛，所以老公就話去返八年前大頭火化間公司度火化，等佢可以之後一齊同大頭細佬玩。

老公一直坐係我身邊陪住我，由我抱住寶寶不停地喊。佢話等我陪多仔仔一陣，想出去至同佢講。
但係坐到 11點幾，我已經嗅到寶寶發出越來越濃既血腥味，所以就同老公一齊送小寶子最後一程。全程我都抱實佢，不停咁摸佢，因為之後真係再無機會可以再摸佢架喇。

之後諗返，小寶子應該早一晚已經感覺到自己會走。因為係佢走前一晚，我半夜突然醒左，發現小寶子瞓係我懷中，完全唔郁，只係一直貼住我瞓，我以為佢太凍，因為星期五晚佢突然開始咳，佢以前都無試過，所以依幾晚都已經係房開暖爐，等佢瞓得好啲。
但佢貼住我瞓，又怕佢太熱，因為佢同我一齊係被中，所以差不多有兩小時，我係清醒咁攬住佢，但又唔可以郁得太大動作，因為平常小寶只係被外貼住我瞓，我地郁小小，佢已經起身走開。所以我都奇怪點解佢今次會係被內，而且仲要痴實我嚟瞓，但因為未天光，我望唔清楚小寶係咪其實有無合實眼嚟瞓，定一直好似我朝早起身見到佢咁，半開一雙無精神既眼。但依段期間，我一直嗅到佢口中傳來的腥味，我之前以為係佢嘔完口中既味道，因為佢係食吞拿魚味既罐罐。但事後諗返，我諗我估錯喇。

小寶子係今年1月甩腳骹後，再係四月復活節失去視力。雖然有好多時會因為唔知自己係邊而周圍小便。但佢咁耐以嚟，都唔會係我地張床都周圍屙，如果我瞓緊瞓，佢會靜靜咁坐係我身邊，等我發現佢，如果我真係太懶瞓，佢至會用喉嚨發出好微約既聲線叫我起身，而唔會好大聲咁叫我起身。所以我地為寶寶一早準備左尿片，一直都未動用。我覺得佢真係好叻仔。

不過，林仔仔，你放心啦。我會將我對你既愛藏於心底，好似對大頭細佬一樣，只係你對我太重要，而且，你陪伴住我地已經有13年，所以媽咪要多少少時間至可以接受得到。但爸爸同冬瓜會陪住我。所以你放心去彩虹橋同大頭細佬玩啦。大頭細佬一個都係都悶左好耐架喇，你地玩住等我地嚟接你地。

最後，我好多謝你依13年嚟既陪年，而且仲好辛苦咁等到我抱住你至離開，等我可以送你走。最後依一年你辛苦喇，你亦都俾左足夠時間我慢慢咁接受你已經老，點都會有離開我依一日。你放心啦，我會盡快調整自己既心情，等你唔洗擔心我。所以你放心去同大頭細佬玩啦。