韓國手信

上年十二月初去韓國，今日至嚟寫返依個trip，真係懶爆呀。仲要先講買左乜嘢手信先。

因為今次跟團，頭三日都喺郊區，所以集中係最尾兩日買嘢。

過到韓國當然買護膚品，paper mask 等。

其實一落機係機場等旅遊巴時，已經係Tony Moly 買左支聖誕節特別版洗面膏（左邊兩支）。本來仲想買埋其它，但俾我媽阻止，因為一到步都未企定已經開始買嘢，佢有啲怕我買到失控。

之後去水族館，自由時間時，俾我發現附近又有舖頭買嘢，又係Tony Moly。依度仲抵，所以又再買多三支洗面膏做手信。同埋少量paper mask。

仲有依hair treatment。

個個都話好抵既樂天免稅店，由於太多人搞到我都無乜心機行同買嘢。

本來想買 "后"，但出發前無做功課，都唔記得自己之前係用邊款系列，過到去見到咁多系列只有投降。

另外本來都想買Laneige 支white plus renew original essence。但個counter 勁多人，迫都迫唔入。嗰度又焗。所以見價錢唔平香港好多，所以再次投降放棄。

但上到嚟唔買啲嘢又好似好對唔住自己，所以走左去平時用開既innisfree，因為唔洗睇又唔洗諗，好快已經執左幾支嘢可以俾錢走人。

夜晚出去宵夜時，行過超市買嘢時，發現髮尾油特價，計返港幣大約$60 左右。所以又拎左兩支。但返到香港至發現同依家用緊嗰支包裝係好似，但唔係同一個牌子。但依款都好多水貨店有賣，我諗都唔會太差既。

依款就朋友指定要買既。佢話依個味好好嗅，叫我幫佢買兩支，所以我都咪蝕，再買多兩支俾自己。

同老公行街時，係olive young 店內發現史力加paper mask。大家即刻諗起我細佬。都無留意牌子及價錢就走左去俾錢。仲忍唔住即刻send 相俾我細佬話佢知，佢有手信。

最後一日係華克山莊賭場外既免稅店，終於可以大量入手。依度位置無樂天咁方便，所以比較少人，但當然無咁多牌子及無咁大啦。但主要大路牌子都會搵到。

今次又係Tony Moly ，因為覺得抵買啲，香港要$30幾蚊塊，依家平均是但計應該唔洗$20/塊(我真係好是但太約咁計咋)。

買 6 packs 送 3 packs。另外再送左啲俾我。因為時間有限。佢俾乜嘢就袋乜嘢，當時都無細心研究。依度 100塊 paper mask總知就唔洗 $2,000。

老公見到我幫我拎個袋時都問我係咪買左好多，因為好重。媽咪又問我買咁多做乜。其實預左有 1/3 既paper mask 係俾媽咪用 ( 人蔘，蛇毒抗皺系列）。

揀企 6 packs 係買既。平放 3 packs 係送既。另外金色鍋牛 2 packs  及 11包24金係贈品。

送左 11包依款24金mask 俾我，當時好似話搽上面........ 跟住我唔記得係點喇。

因為夠鐘要集合，所以不停催佢快啲收錢俾我地閃。

另外，再買多pack 小禮物俾朋友啦。都係paper mask。我其實都唔知同上面買嗰啲有乜分別。但見包裝精美，方便送俾人就照買。

一袋有五盒。可以分拆送俾五位朋友。

每盒有五塊paper mask。聖誕包裝好得意。

旅遊期間，收到朋友whatsapp 話如果見度有依款人蔘貼就幫佢買，因為佢媽咪只係用依款風濕貼有效。見佢咁有孝心，所以我地去中部市場時見到 2,000won 一包即刻掃左30 包。

因為係當地人市場，比出面平幾蚊港幣。我之前係外面買左兩包要 3,000won/包。還掂都預左要買，更係搵間平嚟買啦。