仔仔受傷了

由韓國回來後本來已經懶，好耐無Update 個blog，但上星期家中其中一隻寶貝狗意外受傷甩了後腳骹，更加令我無時間搞任何嘢，要專心照顧佢。

上星期六晚 ( 1月3日) 和家人晚飯後回家已經是零晨，返到家立即餵兩隻小狗食嘢，其中仔仔差點跌倒，但接得住他，但就係因為依一下，亦佢甩了骹。
雖然仔仔好似和平時無乜分別，唔會叫痛和唔舒服，但後腳明顯不能掂地，和不能向前伸直，所以和老公即刻換衫帶佢去睇急症。

因為係零晨兩點多，診所只有兩組人在等，所以我地都等得唔算耐，醫生了解左仔仔情況及見佢行了幾步後，初步估計是盤骨移位，要立即幫佢移返正確位置，拖得越耐越難移。所以只好放底仔仔係診所。我地就回家照顧另一隻。

半夜大約五點多終於收到診所電話，通知已經成功托回正確位置，但要等睇之後情況才可以確認是否沒有問題。
本來想第二日即刻出去睇阿仔，但依間診所有限探病時間，中午個時間過哂老公都未起身，所以只好晚上去睇，但下午就接到診所打嚟，又話阿仔再次甩骹，所以係六點前再出到診所見醫生，再決定應該點做。

醫生有三個建議。1. 做手術；2. 再試托多一次；3. 由佢，不再作任何嘗試。
1. 做手術。因為仔仔年紀大喇，14歲算是老狗，醫生都唔建議做這手術，因為仔仔未必受到咁大量既麻醉藥。
2. 再試托多一次。再試多一次，及這次可能會加上沙布固定腳位置唔俾佢郁動再甩出嚟。
3. 由佢，不再作任何嘗試。

本來都諗住試做多一次2，真係唔得試變成3。
但晚上等到8點到探病時間，見到仔仔後，我決定唔再試2。
因為仔仔跟本啲麻醉藥都未過，完全唔會郁，只係會張開眼睛望，係連頭都唔多願轉動。
所以我覺得佢未必再可以於短時間再次接受麻醉藥及我相信佢下午都應該係無乜點郁既情況下都再甩，再試托多一次都只會令佢受苦，所以見佢仍未清醒，決定俾佢多住一次診所，星期一至接佢出院。

可能麻醉藥未醒，頭兩日阿仔都唔願食嘢，所以出院時，姑娘都提醒阿仔有啲低溫，要注意幫佢保暖，老公聽完即刻除左佢件羽絨外套用嚟包住佢返屋企。

經過幾日觀察同食藥，阿仔依家活動能力跟之前無乜分別，後腳都可以用到少少力及行到，比我地預計既情況好好多。依家我地已經放心好多。