因為無乜特別嘢想買，而且要排幾小時，所以真係減低哂想過去既沖動。
但係 10月03日係Media 及 VIP 優先入場日，今年竟然出現好多紫色ITEMS，又中我死穴。所以同老公講，好想過去。
老公二話不說已經話想去就去。
我地二點半左右到達酒店外圍，排到去鼎泰豐，見到龍尾本來已經同老公講算，唔排，但佢又話過去睇吓點先，一排隊就會有工作人員每人俾張籌大家，以防突然有人打尖。因為每次走開都要登記及半小時回到隊，如果唔係就要重新再排。
因為每一組有45分鐘購物，所以每一次都要排45~50分鐘條隊至會郁，我地等左兩回至可以入到酒店內，酒店內還有Room 1 及 Room 2。
入Room 2 前要俾invitation card 登記及取購物袋。我地太約5:05 入到Room 2，但等到差不多6:15 才可以移到上一層入內選購，而依段期間，5點多到場既人，已經可以直接登記及進入Room 2，因為我地入嗰場已經係最尾一場。
本身見話至下午5點，所以至2點幾到，估唔到差不多6點仍然可以入內，激死。
一入到場，本來被個cassis tagine 吸引左過去，好彩老公即刻提我搵左我想要既嘢先，所以即刻走返去中間貨架上，好彩老公提一提我，因為架上仍有黃色大盒，即刻開嚟睇。
好多peach 花花呀，攞左 2 盒，再搵到一盒peach 心心，眼前有一盒我無打開，俾人拎走了，原來係我好想要既大紫心心呀，後悔死我。因為之後點搵都搵唔到紫心喇（大細心都搵唔到）
大心心，花花 - $260
細心心，花花 - $180
今次仲買到我上年買唔到既粉紅及粉藍心心杯，今場係大量，任揀。$280/對，價錢同上年一樣。
仲有好抵既粉紅色湯盅，一對$320。
Dessert Cup，其實我都唔知買嚟做乜，但佢有Lavender，由於唔可以單丁一隻，所以見到peach就順手攞埋，老公見我check 貨時都問我買嚟做乜?? 要哂兩隻??
我答佢食糖水用，我地每人一隻，佢就唔再問，由我喇。哈哈..... 我係咪真係會用嚟食糖水，依個係個迷，價錢好吸引，$100/隻。
但返到嚟有啲後悔唔買哂兩隻都係Lavender。
焗盤，上年已經想買，但最後無買，所以有啲後悔，本來攞左隻細啲既 18cm - cb，順手攞埋依隻26cm 過嚟揀，老公覺得18cm 太細，不如買個大既整薄啲，可以焗得快啲，所以最後揀左26cm，仲要係我最愛既Lavender顏色。
無意中係混亂既貨架上見到有兩個盒，見盒就開，竟然再發現兩樣Lavender 產品。
7" Cereal Bow - $120
Soup Bowl - $130 ( 其實我好似已經有Lavender 既Soup bowl，但唔肯定，買左至算）
幫朋友買既 Spoonrest - powder pink - $100。
老公覺得依樣好無謂，所以我自己無買。
今日買左以上產品已經兩大袋，老公又唔俾我幫手拎，我都知好重，仲要行遠啲至搵到的士，真係辛苦哂佢喇。
今日只為我既紫色團隊增添四位成員，但我會努力嘗試用橙花同人交換大小紫心返嚟既。
其實依段期間，我都好努力增加左幾位成員。
沒有留言:
張貼留言