Our Memory: 圓鐵板燒 Xpress Teppanyaki

前幾年同老公去台中，曾經行夜市避雨時，無端端係個商場入面食鐵板燒，好記得嗰檔叫大埔鐵板燒，由於個舖係一個好up dun既商場內，而且不是店舖，只係商場內一個檔位，即係你食嘢時，行街既人會係你身後行過，當時由於無嘢做，又新奇，所以就試吓，但估唔到味道都不錯。

所以當發現旺角新世紀food court 內有台式鐵板燒，就同老公去試喇。

一坐低，已經每人一份餐具及湯，好似係粟米湯，送既也不太理會係乜嘢湯。
由於唔想太煩，所以叫了份二人餐 - 澳洲雪花西冷牛扒海鮮二人套餐 (澳洲雪花西冷牛扒，龍脷魚扒，中蝦及青口）

一張鐵板枱，一個師傅跟全枱客人，大概十五人左右啦。由於我地後加入，佢差不多煮完其它枱既嘢食，我地既食材至啱啱拎出嚟俾佢整，所以之後整嗰啲全部都係我地。
由於係咁，其實都食得幾急，因為所有嘢都會放哂係你面前。

細佬知道我地去食台式鐵板燒，本來佢都有啲興趣想嚟試。但當聽到我話依間蒜味都幾勁時，已經話無興趣。因為佢唔多好蒜頭，太重蒜頭味更加會唔食tim。

台式同日式有乜嘢唔同？？
台式：會用張錫紙放係你面前既鐵板前，整完放係你面前，用枱邊熱力幫食物Keep溫。同時會不停煮，可能同時一次過整幾款，直至煮哂為止。
日式：每整好一樣都會分好放入你面前既碟上，會一款一款嚟整，由於係咁，所以每次食既嘢都會係啱啱好既生熟程度。而且因為即時放到碟上，食物都係熱的。
當然，以上兩款價錢都相差好遠。唔可以用台式鐵板既價錢而要求日式鐵板既質素。