2014年情人節

其實依家我對節日無乜特別感覺，唔一定要求要有禮物或者出去食一餐飯。
但點都要過下二人世界，所以本來早一日已經係Aeon買定和牛扒諗住情人節自己整嚟食。（因為唔想出街同人迫，又要趕住交枱俾人）。
但係買完嘢至記得情人節當天家人由台灣旅遊回港，老公要去接機，及和家人講好一同食晚飯。所以啲扒就順延一天至煎嚟食喇。
但係最估唔到，老公係出發到機場前，靜悄悄地走左去TST LC counter度買禮物俾我。
呵呵呵，係呀，我又有禮物呀，仲要係近期大愛既LC，老公見我近排鍾意飲朱古力奶，天氣又凍，所以買左依套set俾我沖朱古力奶嚟飲。

第二晚就煎左啲扒嚟食，因為天氣太凍（10度以下），完全唔想郁，又唔想落街買嘢，所以見屋企有乜就整乜，配菜乜嘢都無，見有罐頭羅宋湯又煲鬼埋佢。總知唔洗落街就得囉，是是但但食左佢就算。
好彩只係買左一件靚和牛，另外買左件平啲既澳洲牛扒，因為和牛好膩，食唔得多。