收相 + 令人失望的攝錄師 - Henry Poon

4月5日其實已經收到Phil通知有相拎，但同時係電話中通知我地話攝錄師 - Henry係製作片段時死機，但已經拎左部機出去救，睇下救唔救得返，救唔返既話，晚上既片段就全部無哂。初時都覺得問題不太，因為我覺得最重要既都係早上及註冊部分。

由於心急想睇相，而且過兩天會見到屋企人，咁可以一齊睇相，所以當晚收工即上Phil既studio度攞相。上到去老公都主動問情況，Phil亦都有重新說明及提出賠償方案，我地亦好明確指出，最好可以救返片段，因為錢就一直預左要俾，同埋已經俾哂錢，但婚禮無take 2，賠錢俾我地亦無乜意思。
其間我多口問一句，伯大尼註冊部分既片段係咪都有（因為我一直覺得伯大尼係早上部分，唔屬於晚上），點知佢竟然答我係＂無＂，現在取回的片段只係去到入左男家部分。仲半安慰我話好彩same day條片有我地讀誓詞部分。講真，我真係失望到死呀。因為由爸爸帶我入教堂只有一次，但依家連條片都無埋。

Phil本身話約1~2星期就有結果，但過左2星期都無消息，所以我只好係4月22日再whatsapp問下情況（其實都有諗過等佢地主動回覆，但諗深一層，佢地唔係當時人，我急佢唔急，所以只好再次自己主動問）。但回覆結果都係令人失望，話Henry 回覆由於太多資料進出，所以無法修復。

其實依兩個星期都有同老公傾過，如果係死機，應該都救得到，但佢地通知得我地有咁既情況，佢地都預左救唔到，可能係過左成三個月，以為已經交左片段就Delete 左條片。
依兩個星期，其實都俾左啲時間我地接受左好大機會救唔返條片。但收到消息時，心情點都唔多好。

由於之前一晚，爸爸仲問我條片幾時有得攞（由於未確定條片係咪真係無，所以一直只同屋企人講條片仲未剪好），所以當晚晚飯期間都主動講出事實，見到爸媽既失望表情時，至發覺我覺得不太重要既晚宴片段，對佢地嚟講都好重要，因為睇住我出嫁只會有一次，所以所有既部分對佢地都好重要。
老公係第二朝都有問我，點解咁快同屋企人講，自己心情已經唔好，仲要解答佢地既提問，怕會搞到我心情更差，佢覺得唔提，慢慢佢地就會無左件事，就會唔記得無睇過註冊及晚宴既片。但我講出爸爸係前一天主動問條片幾時有，佢記得條片時，我老公也無言了。

係依段期間，由一blogger全脂賢介紹左間recover公司，由於已經過左差唔多成四個月了，怕拖得越耐越無機會救返，所以即刻叫老公聯絡Phil，睇吓Henry肯唔肯借個hard disk嚟試recover。但過左一星期，Phil回覆話Henry無回覆過佢，所以俾左Henry電話我地自己試下聯絡佢。（Phil曾提過，因為依件事同Henry反左面）

5月13日老公打俾Henry，無人聽電話，所以就whatsapp Henry，希望佢可以幫忙提供hard disk嚟試recover，但到今日5月19日，Henry都係選擇不作任何回覆。
上網睇依位Henry先生自稱為＂Professional Videographer＂，但係基本既backup也做不好，而出錯後就選擇潛水，咁都可以叫Professional？？
真係一位令人嬲爆既videomen。

Henry Poon - http://henry-film.com/

https://www.facebook.com/HenryFilmProduction