雙方家長見面

拖拖拉拉, 終於係過大禮前見面食飯喇.
其實同男友一齊咁多年. 雙方父母都見過兩, 三次. 但都無正式坐低一齊食過飯 , 傾過計.

今次揀返去擺酒既酒樓度食晚飯.
同行除左雙方父母, 我地兩個外. 仲有我細佬, 男友家姐一家(即姐夫, 仲有一個一歲多BB).
老實講, 有BB在場, 注意力俾佢吸引左唔少. 時間都過得快啲.

我訂位時, 無特別搵返負責婚席既莫經理幫我訂位. 但我地到左後無耐, 莫經理都發現我地. 主動過嚟打招呼. 可能我太煩喇. 所以都記得我.
今晚有客包左半場做聯歡. 莫經理都幾忙. 而我地又唔可以睇到全場景觀喇.

我地九個人, 費事煩, 叫左個十二人餐. 初時上菜比較慢. 但之後上菜速度正常返.
大家都話啲嘢好食, 又夠大碟. 就算十二人食, 都食唔哂. 我諗我地包走既食物, 都有個餐既一半.
第一道菜係片皮鴨. 奶奶讚好食. 仲問我地結婚當晚個菜單會唔會有片皮鴨食.

就係咁. 我地就完成雙方家長見面依一餐喇.