裙褂 - 京華

其實早於四月底、五月初時，男友已經陪我去睇過吓啲褂。點解要睇，因為我對褂真係零知識，所以去了解吓，順便知道大概乜嘢價。
其實睇其他blogger 都提過，多啲紅色睇上去會後生一啲，太多金線，雖然貴氣啲，但可能會睇上去成熟啲，所以心目中都係小五福，因為有邊個女仔想俾人話老架。
其實見楊千嬅著褂皇咁靚，都想試吓，但俾男友ban 左。

永隆繡莊
依間係朋友介紹，佢話依間價錢較平，佢都係依間度租。
去到表明來意想租褂，因為有另一位試緊褂，所以叫我地先睇相薄，但講真，太多款喇，我同男友覺得好似全部差唔多、無乜分別咁。所以我放棄睇相薄，直接問小五福價錢，好似話大概$650左右。咁順便問埋媽咪、婆婆褂既價錢，一般數量既金線都係6、700左右。咁返去問吓佢地會唔會考慮著先。
佢地有提過，如果我confirm 租褂，會即時封褂至我結婚。但講真，我入左間舖只係五分鐘左右，又有人試衫、租衫，咁好生意。我租件衫只係幾佰蚊，點會真係封褂。所以我對封褂真係唔太在意。手工，又係唔識睇。


由於我記得上海街好似唔只得一間褂舖，而我地又無嘢做，所以男友就話行向油麻地方向再睇，點知，原來以前既褂店，無左好多喇，有啲招牌仍在，但內部已經轉型喇。印象中有幾間架嘛，點知行行吓，已經行到去油麻地。好彩四、五月唔熱咋。



馮滿記繡莊
依間真係間老舖，因為以為全部依啲舖都係用大、中、小五福嚟區分啲褂。所以指住門口廚窗嗰件問係咪小五福。點知其中一位伯伯已經好激動咁話，你講得出依三個字（指小五福）就知道你唔係要搵我地啲款，我地嗰啲真係傳統款，唔同出面嗰啲。
講真，佢咁激動我都俾佢嚇親，我亦怕我再問落去，佢會爆血管，所以即刻講聲唔該再閃人。


京華禮服綉品公司
依間係馮滿記對面馬路。入到去有兩夫妻。講真，老闆有啲惡，但知道我地下年一月至到婚期，叫我八月至再嚟租，因為我太早租，佢封唔到褂。雖然要我八月再嚟過，但老闆都介紹左廚窗中既褂，等我大概了解吓，雖然話惡，但佢最後都有笑容既。老闆娘就多啲笑容。
可能係因為佢唔肯即時租俾我，所以令我相信佢真係會封褂。但我都提過，封唔封褂，真係問題不大，但佢地已經令我對佢地加分，因為我都係搵間老實舖。
其實踏入八月已經想去租褂，但又怕去到又話早，所以今日見無乜嘢做就同男友講去租褂。四點幾出到去，當時舖中只有老舖娘，未有其他客，好彩無客咋，因為五點幾有客約左嚟試衫，所以老闆娘就襯依段空檔介紹俾我。
老闆娘睇清楚我身型、身高後已經問我心目中想要乜嘢價錢，因為佢話得返一千至千六左右既款啱我，其他平款都俾人租左。我真係突一突，又係你叫我八月至返嚟，聽你講八月至嚟，嚟到又話無乜款啱我。佢之後解釋，依兩個星期好多好似我依啲身型既人嚟租。
咁還掂嚟左，而本身都想試多金線同少金䤼既效果。咁叫佢照俾我睇啦。佢只拎到一套出嚟，咁只好再問佢仲有無，佢check 左一陣、又要打電話問，至搵到多一套租過一次既出嚟。（我之後到落單時至知道第一套係大五福，第二套係中五福）
其實點解我問仲有無其他，因為第一套大五福一嚟比的預算貴左，同時亦都好似太多金線，出租過兩次。第二套係中五福，據佢所講只租過一次。兩套放哂係台，咁就可以比較到，中五福較接近我想要既多啲紅，同時，套中五福既金線明顯較令。套大五福啲金線相對較暗啞，但其實有得比較至覺，之前只係拎一套出嚟時真係唔覺有問題。所以即使套中五福較貴，但我都較鍾意中五福。
老闆娘建議我先試大五福，佢睇得好準，好啱身，著上身後男友都話好睇（本身佢都覺得多紅啲會好睇啲），著上身唔覺啲金線覺得舊或者暗啞依啲問題。
跟住到中五福，我只係套左件衫上身，老闆娘都未幫我拉條裙上身，我男友已經話唔洗試，第一套好睇好多，連老闆娘個女都係咁講，大五福襯我一啲 。我都有問乜嘢原因，係咪因為依入較鬆，因為依件無第一件咁貼身，男友話係我唔係咁襯褂嗰種紅，我反而著多金、銀好睇啲，反而著中五福睇上去仲老左。咁佢地都咁講，就再試多次套大五福影相。因為依度要confirm 邊套，至可以影相。就係因為咁，我最後就租左一套原全無諗過會租既大五福喇。
據佢地所講，佢地係我租左套褂後就會封褂，連俾人睇都唔會。咁信不信就由你喇。
大五福（出租次數兩次）：$1180
中五福（出租次數一次）：$1380


京華 - 大五福 . 從由朋友中得知, 依套叫金龍銀鳳

京華禮服綉品公司
佐敦上海街194號地下
Tel : 2384 2082


馮滿記繡莊
油麻地上海街203號
Tel : 2384 9553

永隆繡莊
上海街409號 G樓
Tel : 2780 3007