Our Memory: 聘珍樓

商戶評分
最高為5分 -

******************************商戶: 聘珍樓 - 觀塘店
評戶:

4分 (最高5分)
*******************************

其實本身對聘珍樓評分都幾高，因為我對莫經理都好滿意。
例如係婚前幾日由其他blogger中得知佢部掛熨有漏水情況，同莫經理反映件事，佢check返部機後，好快已經覆返我地電話，保証我地結婚當日一定有新掛熨用。（當時佢只有兩日左右時間更換）。其它基本嘢都係有求必應。

聘珍樓本身裝修已經唔錯，同埋佢地都包基本佈置，佢地係請一間佈置公司返嚟搞架。咁我地覺得個基本佈置ok。所以都係用佢地既佈置，只係另外俾錢加台上既白色地毯，唔係全新，只需要加$500，價錢合理呀。

而我地自已外面整兩個formboard，莫經理都叫左間佈置公司幫我地掛起及放好，咁我地又煩少樣。

依度有兩間新娘房，一間較細，另一間就用晚膳用既VIP房變成大一點既新娘房俾姊妹兄弟作休息及存放物品，但兩間房都係無洗手間的，當晚係我去得最少廁所既一晚，只係上到酒樓去左一次，之後就等到散席換左便服至再去，因為著住晚裝去洗手間真係唔多方便。

Carrie早過我到酒樓，佢睇完兩間房後，選擇用間細房，因為有鏡同埋無咁黑。其它兄弟姊妹就用大嗰間新娘房喇。

因為預左四點左右會到酒樓，所以要求酒樓由五點開始席前小食，負責既職員都會拎食物到兩間新娘房，點心真係麻麻地，但佢地話啲炒麵同炒飯（好似有炒飯）好好食，但佢地同我講時已經食哂，因為想佢地都拎一份俾Carrie，因為職員只係拎左點心俾我咋，另一邊就有拎炒嘢俾佢地食。好彩老公有拎芭芙入嚟俾我同Carrie食啫。

席前同賓客影相期間，發現台邊有兩位職員係負責為我地準備斟茶既用具，咁我啲姊妹只係需要幫手拎茶具俾我地就得，跟住就可以交返俾佢地洗杯，因為親友唔係全部早到場，所以成日影影下相，又要斟茶，要佢地成日搬上搬落啲椅，我都覺得唔好意思。

好鍾意佢地既器皿，兩圍主人台既碟係鴛鴦圖案既＂囍＂字。而其它賓客的碟亦都有圖案的，好靚。

當日我至發現，原來依度都會有一位女職員照顧我。例如睇我幾時可以準備進場，佢會同出面一直跟進，係新娘房門外等我，待我準備好至通知出面開始播片。席間又會幫我儲起我地無時間食既食物，等我地回到家都有嘢食。又會帶住我地敬酒。

嗰日我至發現，原來依度都有射燈照住我地進場架。因為一直覺得佢地唔係做婚宴為主，所以預左佢無，所以一直無問過依個問題。

當晚同埋之後啲朋友都同我地講啲嘢食好食，其中一個姊妹話連啲橙都好好食，唔係平價貨，但我嗰日無時間食呢。好彩酒樓幫我地包好左兩盒食物，半夜返到屋企叮返熱啲嘢都好好食，不過我覺得個糖水無我地上次去食晚飯咁好食。同埋無包橙俾我地，我試唔到係咪真係咁好食。

需要改善既地方，聘珍樓係用projecter，全個場好似有三部，當初睇場時見佢有就以為無問題，當晚至發現，原來播片係睇得唔清楚架。如果佢可以改善個清晰度就更好喇。

講到佢地咁好，點解都會被扣分。其實我本身唔覺，因為我有少少遲鈍，但老公同爸爸都講過，覺得職員態度麻麻地，即使係照顧我嗰位職員，老公話佢係席間都有少少黑面（我本身無留意過，所以唔知係咪）。

另外就係有一位經理，係我地埋完單後，至提出要再收清潔費用。其實依位經理係之前我上嚟酒樓攞嘢時，都聽過佢講嘢態度麻麻地，可以話係黑我憎。
我地都明白嗰晚我地啲賓客係飲得太過開心，有啲人嘔污糟左啲地方，所以係埋單時都俾多左少少tips。但完全無諗過佢係等我地埋完單俾哂錢至提出。雖則唔係多，都係要求$500，但係都令人唔多開心，同埋佢既舉止，老公同媽咪都覺得啲錢係佢自己袋，唔似會俾個清潔嗰位同事。

主家席既餐具同其它賓客台唔同架