紫軒花店

商戶評分
最高為5分 -

******************************
商戶: 紫軒花店
評戶: 5分 (最高5分)
*******************************

紫軒花店只係一間屋企附近街市既店舖，我家每次需要買花或者送花牌都會搵佢幫手。

係12月初正式到花舖訂花球，其實之前一早想訂，但佢唔肯咁早接我張單，話費事太早唔記得，要我婚前一個月至過去搵佢。

我係俾相佢跟住做既，因為一早已經決定用乒乓菊做花球。今次過去正式落單時至知道原來乒乓菊有幾個國家唔同既品種，唔記得邊個國家既品種會圓一啲，其它就無咁圓，咁朝早個花球會影咁多相，更係要最靚嗰個啦。其它襯花就叫花店幫我搞掂。 

搞得最耐同最頭痛既係四大長老既襟花，因為我想用葦蘭，但原來葦蘭都幾貴，因為一支太約有10幾朵，而我只係要4朵，所以都係用返全支嚟計，平均要成$40~50/個。有諗過轉用其它花，但我諗到想用既原來全都係貴花，差唔多價錢，玫瑰嗰啲又唔想用，所以依部份再考慮吓先。

一個星期後，再返舖頭訂頭花，其實叫紫軒幫我訂頭花，同我出去花墟自己買差唔多價錢，只係我怕婚前一日自己太多地方要去，無時間去買頭花就大件事喇。咁順便決定埋長老襟花，老公其實見我咁頭痕，就提出其它親戚都用埋葦蘭，咁我可以用哂全支花朵，影相出嚟效果又靚，平均價錢又可以減至太約$25/個。本來都諗住用依個方案，但去到舖頭，佢竟然拎左支假蝴蝶蘭俾我睇，佢話特登為我而拎，睇下我啱唔啱用，佢怕我勉強自己訂左葦蘭，我同老公睇完都覺得好真，所以就揀用假花喇。平均每個$28/個。

好彩決定係紫軒訂埋頭花，因為婚前一日搞掂返到屋企嗰邊已經差唔多7點，差啲唔記得仲要去拎花球，好彩間舖近啫。

但估唔到拎花都差唔多搞左成半個鐘，因為佢竟然為左我而攞多一套顏色既花返嚟俾我再揀。我本身揀左繡球花，吉梗，牡丹，仲有佢送左母忘我俾我。
繡球花佢拎左兩支，一支偏紫藍(帶藍多一啲)，另一支就係一邊則是一邊淺粉紅，一邊粉紫色；吉梗就淺綠同白色任我揀；牡丹就係一束入面揀最靚嗰幾支。

花球，個花球我真係超鍾意，我婚後一個月後都仲同老公講，我真係好鍾意個花球。
我同佢提過唔想個花球太大個，因為我細粒，怕花球太大個，影相出嚟效果好怪，所以個花球尺寸特登做細個啲。嗰日啲姊妹都讚個花球好靚同好襯我，因為都係細細粒。

Big Day嗰晚真係太多嘢拎，如果唔係，我一定會拎埋走個花球。我之後成日都好掛住個花球。

價錢我覺得好抵。唔洗$900已經包哂全部嘢。

長老襟花唔記得影相，所以只有當日既相，除左蝴蝶蘭係假花，其它襯花都係真花，我媽過左幾日都問我點解個蘭花咁襟放，仲未謝。

以下就係頭花，其實望住佢地都好似唔多夠咁，都有啲擔心。
但因為個繡球花有兩種顏色，所以朝早褂頭同婚紗可以用唔同顏色既繡球花嚟襯。


老公既襟花，因為我無為佢準備卡紙嚟固定襟花位置，諗住Ｔ扣就可以，但朝早接新娘時因為郁得太勁，啲花瓣已經開始甩甩地。註冊完之後直頭已經走哂樣，所以唔太建議用乒乓菊嚟做襟花。不過都有機會係我地太粗老。