自家製鳳梨酥

我自己更係無咁叻可以自已研究到鳳梨酥點整，但好彩係group 度搵到個好好味既食譜，係用意大利新抱廚房既鳳梨酥食譜，真係好好食。個餡係真材實料既菠蘿嚟整，唔係用冬瓜溶啦。

http://jscucina.blogspot.hk/2014/01/taiwanese-pineapple-cake.html?m=1

之前已經試整過一次，菠蘿太生所以比較酸，但由於太酸所以要落較多麥芽糖嚟調甜味，同埋第一次包時唔太識包，所以啲餡整左落啲酥皮度，焗完較硬，因為個皮整撈左啲麥芽糖。

所以今次買左三個比較熟既菠蘿，諗住甜一啲，唔洗用咁多麥芽糖，麥芽糖係落少左，但好似唔多夠酸，好似酸啲比較好食同濃味一啲。
不過熟啲既菠蘿自己容易切一啲，本來諗住係生菓檔度買可以幫我開埋，但原先嗰檔生菓檔賣緊其它賀年生菓，要新年後至再入菠蘿，所以只好去惠康買，自己開。第一次已經開菠蘿，比想像中容易好多。

三個菠蘿榨完後太約有 2,000g。煮完太約有 1,200g。

今次有左上次既經驗，所以分份量時，餡太約13~14g。而個酥皮就太約 23~24g。因為第一爐用20g係皮薄，較難包，同埋一放入四方模再壓平時，四周較易裂開，爆出餡料，所以寧願厚一點點，雖然老公不停讚20g 依個份量皮好薄，好食。

以下相片，是第一回試整時拍既照片，反而今次正式整就無乜點影相。

意大利新抱廚房食譜：
鳳梨餡：
1. 菠蘿一個，用blender 輕輕打碎。但不要打成汁。
　下次想試吓部份用手撕，睇吓會唔會有微熱山丘嗰款口感。

2. 將鳯梨放入煲內煮，直至收汁至 2/3 左右。就可以落麥芽糖。鳳梨同麥芽糖比例是 3:1份量。以我今次為例，鳯梨有 1,200G，即麥芽糖要落400G。但當然這只是比例，要續少落，不停試味，因為每個鳳梨甜度唔同，所以落麥芽糖也有不同。
上回我買既鳳梨較生，所以較酸，落多好多麥芽糖。但今次特登買熟少少既，所以可以落較少啲麥芽糖，但食落好似酸啲好食啲。

3. 最後煮至收汁，如以下相片效果就可以關火。待涼。

酥皮：
1. 室溫無鹽牛油280G，加糖粉 100G打混。

2. 加入己篩過的低筋粉420G，奶粉60G，芝士粉40G。攪混，加入兩隻蛋打混成麵團。

3. 將麵團用保鮮紙包住搓成長圓條，放入雪櫃至少1小時。
　做鳳梨配前才拿出來平均分割，搓成圓球形。每份約23~24G。

造法
1. 將球型酥皮壓扁，放入一粒鳳梨餡，搓圓，再放入四方模，輕輕壓平表面，填滿成個模。再反轉再輕輕壓平。

2. 連模一齊放入預熱 180度烤箱8分鐘，或者轉成淺黃色。取出反轉烤5分鐘。轉金黃色。再取出再反轉，再烤5分鐘至金黃色，取出。連模企起放涼才脫模。