過大禮

噙日終於過左大禮喇.

由於未來老爺同奶奶係傳統既人, 堅持要過大禮, 有好多嘢都跟到好足.
但由於我媽咪有好多嘢都唔需要, 所以有好多嘢已經用利代替左實物. 如果唔係, 我諗多幾張枱都放唔哂.

老爺, 奶奶之前自己已經過左觀塘街市度訂過大禮既嘢 . 所以我地星期六一齊飲完茶之後就先去奇華買囍餅. 然後就過觀塘街市.

街市附近無停車場, 但樓下可以停一停車. 男友做搬運工人. 老爺, 奶奶就堅持要親眼睇左至肯收貨. 所以我依位無謂人就只可以負責睇車 ,  無得上去八佢地係邊度訂嘢.

其實大部分嘢都係哂依度搞掂哂. 所以係度攞完嘢後就可以返男家分嘢, 佢地將所有嘢分開一袋袋, 男家還男家, 女家還女家. 咁就方便我地到時回返俾男家.

星期日朝早同男友食完嘢. 就返上媽咪屋企等.
係, 我係可以參與過大禮, 老爺, 奶奶話我可以出現.
好彩我可以出現. 因為家姐, 細佬都唔係香港, 如果我唔可以出現得返兩老, 咁就太冷清喇.

2:15pm . 男友細佬同家姐就到喇. 仲要行兩轉至搬完. 真係辛苦哂. 因為我屋企要行五層樓梯架. 行兩轉仲要搬嘢, 都唔好話唔甘呀.

坐一陣, 傾一陣後, 佢地就走喇. 由於太多嘢. 所以今次我都幫手搬返落車. 都有成六袋/藍嘢要搬走. 就係咁. 咁就完成左個過大禮喇.

有好多嘢, 其實我都唔知係乜嘢嚟, 都係睇依條LINK 睇返係乜.
http://www.chinesewedding.com.hk/gifts_big5.html

以下依幾樣, 係女家買俾男家既嘢: 菓藍, 回茶禮,  蓮藕 , 其實仲有兩菓嘢, 我都唔知係乜嘢嚟.
老爺, 奶奶幫我地買埋. 我本來以為全部嘢都係男家搬上嚟. 俾返一半佢地就得. 但原來我地都有嘢要買.依幾樣嘢, 星期六我同男友先搬左上媽咪屋企先.

回茶禮 : 大發, 紅包, 煎堆, 鬆糕.

由於未來老爺同奶奶怕我地搞亂. 所以一早已經將所有嘢分好哂, 我只係記住邊袋係女家, 留起就得. 所以我都費事拎哂出嚟影相. 搞亂左, 我都分唔返, 因為實在大多嘢喇. 依張相係我媽咪影. 我之後至發現影得唔太清楚. 地下嗰三, 四袋影得唔多清楚.

星期六, 我地過去一齊攞過大禮既藍, 菓藍, 囍餅等.
好彩4支酒一早搬左上男家.

男家拎嚟既過大禮藍.

過大禮, 要過埋餅卡, 所以將啲餅卡, 過大禮前又要拎埋過男家.