輕黏土玫瑰花簽名筆

上次學完整輕黏土後, 一直都想親手做依款既簽名筆.
所以上笋崗買嘢時, 順便係嗰度買埋材料. (因為怕整唔到, 平平地用國內貨, 唔買日本貨啦)

其實都有少少擔心怕會已經唔記得點整, 因為我好少真係可以學完之後, 可以做返出嚟, 整前都真係要諗一諗某d 步驟. 今次真係可以學以致用 , 真係極少可.


以下是完成品. 旁邊既花仔改用左絲花.

首先將支筆包好絲帶, 然後係頂部加上輕黏土做花芯, 我自己選用了自己應該唔會點用既顏色, 因為完成後, 係唔會見到依個花芯架.

要先準備一張濕紙巾(唔甩毛既, 我用左紙拖把嗰d 紙, 其實可以選用廚房紙巾)
紙巾少少濕就得, 因為係用嚟保持黏土濕度, 如果紙巾太濕, 你搓時, 黏土會痴哂落手, 一pat pat 咁.
先把已經選好顏色既黏土分成15小粒於紙巾上, 未用前可以用紙巾蓋上, 以保持濕度.

先取其中一粒黏土, 搓成圓形

然後用掌心, 最厚肉嗰個位壓上圓形黏土上.

用食指, 於黏土上邊開始按壓, 底部是不會按的. 只會按上部, 因為上部是花瓣邊位 - 要薄邊, 底部是花瓣底部 - 要厚一點點

按完後, 一般形狀好似以下咁, 上寬同薄, 下則窄同厚一點的.

完成15片花瓣後, 揀選5片較大片, 用來做外層花瓣用的.

選用較細片的花瓣用作最內層花瓣 , 放用掌心中, 用手指關節位把花瓣壓曲.
(每片花瓣也需要壓成彎曲狀)

將第一片花瓣貼上已經準備好既花芯上, 花瓣中間部分及底部完全黏實花芯, 將花瓣頂部位置盡可以彎曲接近變成圓形 (隋圓形).
( 由於初時我張紙巾太濕, 所以令到黏土太濕, 用手壓下時, 有部分黏土痴上手中, 所以見到圖中花瓣會變為凹凸不平, 但好彩依個係花瓣內層, 無人見到依部分, 影響不大)

然後貼上第二片花瓣 , 第二片花瓣中間位置 , 是貼於第一片花瓣既接合位上.

注意, 每片花瓣既高度, 要同一水平.

之後再貼上其它餘下的花瓣 , 步驟其實都一樣, 初時形態係唔太似玫瑰花的, 因為我一邊整都一邊懷疑自己有無可能整得到.

貼上大約十片花瓣後, 形狀應該好似下面圖片.

之前揀選較大片的5片花瓣, 將彎曲部分向外 ( 之前是彎曲向內的 ).
先把花瓣中間最凹位置貼於已經貼好既花瓣上.

然後順住把一邊既花瓣貼實, 咁樣, 這花瓣的另一邊貼會向外彎曲

然後上第二片外花瓣 , 第二片外花瓣中間位置 , 貼於第一片外花瓣中間置上.
其餘花瓣同樣地貼上, 外花瓣約5片已經足夠.

樹葉, 由於我買回來的顏色- 綠色太鮮色, 所以要用少許黑色混合起來, 咁就變成深綠色.

將樹葉搓成以下, 上幼, 尖 , 底部則厚, 寬.
每朵玫瑰花約三片, 樹葉底部貼於花的底部, 幼同尖的部分部是不用貼實花瓣的.

最後可以加上其它配件作裝飾 , 但配件插入黏土前, 需要搽上膠水才好把配件插入黏土中.

我買左依款輕黏土, 一包有八個色(好似), 但我另外再多買了一包全紫色(大包)的, 以防唔夠用.
我做2朵玫瑰花 , 依度一個顏色是不夠用的.