笋崗+東門半天遊

噙日終於同另一位準新娘朋友上左去笋崗喇. 買左好多嘢, 好滿足.
依幾日都落雨, 好彩我地都係差唔多買完嘢至落左一陣. 之後就無雨喇.

我地今朝十點多到達笋崗, 見有人話附近D中心有絲花買, 所以搵左一陣, 但行入左個中心內d 嘢好貴呢. 一個花瓶都要RMB500-600. 所以唔再搵喇. 因為地方實在太大同太多唔同既中心喇.

由於之前有朋友係飛雁買嘢話平, 所以我地直接去A座度. 係入口有一檔好多利是封, 好多款, 好多紫色, 但由於目標唔係佢, 所以只係問一價錢, 再入去飛雁度再決定.

飛雁好容易搵, 係電梯口旁, 老闆娘話我地係第一個客人, 所以會計平d 俾我地.
我地都買左相當耐, 差唔多兩小時. 我諗淨係揀"囍"字貼都有一個鐘, 因為太多款, 而我同朋友都係有選擇障礙証, 所以好花時間.

利是封都好多款, 但唔多紫色. 所以無係飛雁度買. 分別係立興同門口第一檔度買 . 由於利是封分開買. 仲要係分開係兩檔度買. 當然無價講啦.
返到屋企至諗起早知買多一pack 紅色利是封俾老爺佢地當日用. 因為佢地一定要用紅色.

由於當時太混亂喇. 所以唔見左張單, 只係記得好平, 同少部分產品價錢.

跟住就座的士落東門搵姊妹既毛毛披肩 . 其實飛雁都有 , 但只有一款綁絲帶結款 , 唔係我想要既款 . 佢開價RMB48 . 但話可以平 , 但由於唔係我想要既款 , 所以無講價 . 但睇過實物 , 質量唔錯 , 之後去埋東門至知道飛雁係最平 , 而且質量係最好既.
由笋崗到東門坐的士太約RMB17 , 毛毛披肩有幾個地方都有 , 但分開好幾個商場內 , 一般價錢都要RMB60. 嘩.... 貴過淘寶. 仲要有D 質量麻麻地或好短身(細件). 朋友去過廣州賣婚紗個商場 , 佢會覺得廣州好集中, 容易搵好多. 我地係東門搵左兩三個鐘呢. 好彩噙日天氣唔算太熱同停左雨咋.
以下係買到既嘢, 總數太約RMB400  左右.

利是封分別係立興同門口第一檔度買. 好鍾意左邊中間嗰款紅色利是封, 佢個紅色好靚架.

上頭套裝. 我地合共要四份, 即係平均RMB7.50/SET. 好彩係同另一準新娘嚟買, 如果同男友嚟買, 肯定話我揀得耐, 同因為買嘢數量無咁多, 又無咁平. 

對聯 : 兩男家, 一女家. 由於同男友各自回父母家, 但老爺話我地現居都要貼對聯, 所以多買一套男家對聯. 紙質- RMB7.00/set. (有得揀對聯內容)
紅睡衣(女) , 拖鞋, 細版子孫筒. (唔記得價錢喇)



三菱簽名筆- RMB5.00/支.
細紙杯, 包羅萬有禮封, 利金禮封, 回禮禮封.
其實我已經有兩個包羅萬有禮封 , 係擇日師傅俾我過大禮同舅仔鞋用既, 但上到去, 佢地又話我媽收到過大禮後, 要回一封禮金利是, 同用返包羅萬有禮封嚟回返俾男家, 其實都唔太明, 但買左先啦.

啤牌兩盒 + 紫色汽球

飛雁好多款既囍字絨貼. 揀左好耐呢.
其中最鍾意係鳳凰囍字絨貼(中間嗰行最右) 同彩色貼係玻璃窗嗰張.




大囍字絨貼. 我諗可能有18". 諗住用嚟貼係男, 女家斟茶既位置.

飛雁既卡片, 我地去左105號舖.